Ævintýralífið

M&M

2008-02-01T12:56:00.000+02:00

Uppgötvun dagsins:

Í einu stkykki M&M brúnum sem mér finnst svo góður (sjáf færslu í nóvember) eru hvorki meira né minna en 4,3 hitaeiningar. Er það ekki dálítið mikið?

Ef við leikum okkur aðeins með tölur:

10 stk. gera þá 43 he
100 stk 430.

Niðurstaða: Ég held áfram að fá mér M&M 3 sinnum ári og nýt þess.

Úti er alltaf að snjóa...

2008-01-29T14:23:00.000+02:00

trallalalla...

Ég mætt með fögur fyrirheit og ég veit ekki hvað.

Það helsta sem á daga mína hefur drifið síðan síðast er í stuttu máli:

- Varð eign þvottahúsa ríkisspítalanna í sólarhring. því ég fór í hálskirtlatöku fyrir 2 vikum. Jebb, í annað skipti á ævinni. Vonandi náðist allt í þetta skipti því mig langar sko ekki aftur. Ég fór eftir öllum fyrirmælum og held að ég hafi farið nokkuð létt í gegnum þetta. Afrekaði að borða 1 líter af ís á einum sólarhring.

- Ég er í pásu frá BC vegna hálskirtlatökunnar. En vá hvað ég sakna æfinganna. Stefni að því að fara aftur eftir páska. Á meðan verður World Class að duga. Ég hef breytt æfingunum mínum eftir BC-ið og tek nú magaæfingarnar í hundraðatali og armbeygjur þar á milli. Ég er ekki alveg búin að gera það upp við mig hvort ég ætli að gera Froska. Læt þá kannski bara duga heima úti í garði.

- Við fjárfestum í Garmin eftir laaaanga umhugsun. En hann var á punktatilboði hjá N1 í desember og þegar ég komst að því að ég átti 1200 og eitthvað punkta var ekki hægt að sleppa þessu frábæra tilboði. En þetta er bara snilldargræja og mér líður eins og ekta íþróttamanni með hana um úlnliðinn.

- Eiginmaður, börn og köttur eru bara hress.

Læt þetta duga í dag.

Adios....
Gurný

M&M

2007-11-16T00:06:00.000+02:00

Andinn heltist yfir mig "uforvarende" sem þýðir bara eitt: Skella einu bloggi inn.

Það helsta í fréttum er að ég er búin að borða "nokkur" M&M. Ef það er eitthvað sem ég stendst ekki er það ofangreint sælgæti. Ég ákvað að fá mér fyrst 10 stk, svo sótti ég mér 10 í viðbót sem áttu að vera það allra síðasta. Í þriðju ferðinni eftir næstu allra allra síðustu 10 sykkin ákvað ég að hætta að blekkja sjálfa mig og kláraði pokann. Það var ekki svo mikið eftir, kannski 30(enn í afneitun).
Mér finnst ég líka eiga svo bágt í kvöld því ég er komin með einhverja pest. Skildi ekkert í því í vinnunni í dag hvað ég var að finna til í mjöðmunum, öðrum fótleggnum, olnboganum og fleira. Kom heim og tók til íþróttadótið mitt en fannst ég eitthvað óvanalega þreytt. Mældi mig og var komin með hita :-( Ég fæ svo sjaldan hita að ég þekki varla einkennin lengur.
Engin BC æfing í dag. Vonandi sef ég þetta úr mér.
Svo er ég búin að vera grasekkja í 4 daga sem þýðir að ég á ennþá meira skilið þetta M&M sem ég er búin að gæða mér á (enn meiri afneitun).

Það er eins gott að ég sofi þetta úr mér svo ég komist á útiæfinguna á laugardaginn.

Svo var ég að skrá mig í BC til 23.des. Ég get bara ekki hætt strax.

Lifið heil, löggst í sófan.
Good night.

69 dagar til jóla

2007-10-16T23:53:00.000+02:00

Sá í dag að það eru bara 69 dagar til jóla, mikið eru það nú góðar fréttir fyrir jólasjúklinginn mig. Ég þarf að fara að taka stöðuna á jólasniðunum mínum, efni, límbyssunni ofl. Ég er búin að kaupa mér snið af einum jóladúk sem ég ætla að gera. Mæli eindregið með fondur.is. Í fyrra keypti ég mér jólakallasnið sem ég hafði aldrei tíma til að gera og það er aldrei að vita nema ég geri þá núna.

Ég þarf líka alvarlega að fara að opna augun fyrir jóladagatalagjöfunum. Ég þarf ekki að kaupa nema 48 gjafir til þess að pakka inn.

Eiginmaðurinn er á batavegi eftir hjólaslysið fyrir tveimur vikum. Meira vesenið að brjóta viðbeinið því það er svo lítið sem hægt er að gera í því annað en að passa sig og vona að brotið grói rétt.

Ég á eftir 7 vikur í Boot Campinu :-) Og þetta er ennþá jafnskemmtilegt. Ég finn mikinn mun á mér. Get til dæmis auðveldlega gert armbeygjur á tánum og fullt af situpsum.

Hafið það gott...

Toyota skójóta

2007-09-28T12:55:00.000+02:00

Mitt litla dönskuhjarta tekur aukslög af móðgun þegar ég heyri auglýsingu á borð við:
Vi viser biler i alle stæder!
Ég get bara ekki með nokkru móti skilið hvað er verið að meina. Ætluðu þeir að segja stæði? eða stærðum?
Spurning um að senda póst a Toyota og biðja um þýðingu.

Farvel

Margt og mikið

2007-09-28T01:04:00.000+02:00

Hellú!

Er alltaf að væflast með þetta blogg on/off? Hef ég eitthvað merkilegt að segja? Tja..
Best að koma einni færslu inn.

Á dagatalinu mínu í vinnunni stóð við 27.sept: Haustmánuður hefst. Passar mjög vel við veðrið í dag. Rok og rigning og rok og rigning :-/
Ég er alltaf að bíða eftir þokkalegu helgarveðri því ég á eftir að græja garðinn fyrir veturinn - haustlaukarnir blómstra varla í poka í bílskúrnum.

Ég ákvað að skella mér í Boot camp svona til tilbreytingar. Ég er að klára viku nr.3 og þá eru bara 9 eftir. Í stuttu máli sagt er þetta svakalegasta líkamsrækt sem ég hef verið í. Þarna er sko tekið á því!
Ég var búin að heyra alls konar hryllingssögur af BC en ég hef ekki ennþá séð fólk æla, falla í yfirlið eða deyja þarna inni.
Ég fór meira að segja á 2 tíma útiæfingu síðustu helgi. Mætti galvösk niður í Elliðárdalinn rétt fyrir kl.9. Fékk vægt sjokk þegar ég sá alla bílana og fólk streymdi að. Giska á að það hafi verið 70-80 manns á þessari æfingu. Það sem ég lét hafa mig út í: Ætla ekki að telja allt upp en toppurinn var að skríða í háu grasi eins og hermenn gera. Mig vantaði bara kamóflas gallann og græna andlitsmálningu, þá hefði þetta verið enn betra. Þegar mér fannst ég vera búin að taka vel á því leit ég á klukkuna og ætlaði varla að trúa mínum eigin augum: 35 mínútur búnar!!! Það hvarflaði að mér að ég myndi sennilega ekki halda út 85 mín í viðbót.
En viti menn - auðvitað gerði ég það og var svakalega stolt af sjálfri mér.
Getið alveg bókað það að ég mæti aftur á 2 tíma útiæfingu eftir viku.

Annars gengur lífið sinn vanagang, vikan hjá mér er mánudagur og svo er allt í einu kominn föstudagur.

Adios :-)

Pæling dagsins...

2007-07-26T13:11:00.000+02:00

Þeir sem hlaupa á Esjuna sér til heilsubótar eru þeir í gönguskóm eða hlaupaskóm?

Bara að spá.... því ég ætla að skokka upp um helgina. Hef hugsað mér að fara hægri leiðina og sleppa skriðunum.

The mountain goat!

Veðurblíða

2007-07-15T22:55:00.000+02:00

endalaust!
Þetta er að verða eins og í útlöndum. Maður fer bara í sumarfötum á morgnana án þess að kíkja á hitamælinn fyrst. Dásamlegt!

Skellti mér aftur upp á Esju í gærmorgun. Þurfti nauðsynlega að reyna að bæta tímann minn frá því í þokunni á mánudagskvöldið. Mér fannst erfiðara að fara þetta í þessum htia sem var í gær og þurfti þess vegna að stoppa tvisvar til þess að drekka (stoppaði klukkuna á meðan - kannski er það svindl í tímatökunni??). Ég ákvað að ég þyrfti að drekka til þess að lognast ekki út af þarna í hlíðinni.
Komst upp að steini á tæpum 44 mín. Bara ánægð með það og 3 mín bæting frá mánudeginum. Þetta er hin fínasta æfing finnst mér og ágætis tilbreyting. Næst þegar ég fer ætla ég að fara hægra megin og sjá hvaða tíma ég get náð þá leið. Það er örugglega auðveldara að skokka niður þeim megin.

Dreymdi svo erfiðan draum í nótt. Ég var að hlaupa í RM og það gekk svo hægt og ég var svo þreytt í fótunum. Hugsaði að það væri ekki sniðugt að skokka á Esjuna daginn fyrir hlaup. Hehe... það hljómar eins og ég sé algjör hlaupari.

Ég ætla að grafa upp fleiri sögur af Laugavegshlaupinu. Dáist að fólki sem fer í þetta hlaup. Þvílíkt afrek.

Bara 2 vinnuvikur í frí!!! Jeijeijei...

Sólarkveðja...

Fjallageit

2007-07-11T01:10:00.000+02:00

Góða kvöldið!
Held mig áfram við eitt blogg á mánuði, er það ekki alveg nóg?

Mér finnst komin tími á eitt allsherjar mont/grobb blogg þar sem stiklað verður á stóru um fjallgöngur mínar upp á síðkastið.

Fjallgöngurnar byrjuðu fyrir um 3 vikum síðan.
Fyrst fór öll familían á Esjuna alla leið upp að Steini (ótrúlegt hvað einn steinn getur verið merkilegur). Við fórum leiðina hægra megin upp því við lögðum ekki alveg í allan brattann með 2stk 5 ára börn. Ferðin gekk vonum framar og allir gríðarlega montnir að ná takmarkinu. Krakkarnir voru ferlega dugleg og nú held ég að Esjuferð sé orðin árviss viðburður hjá fjölskyldunni.

Tveimur dögum síðar fór ég með saumaklúbbnum á Keili. Það var fín ganga og þar var það ég sem leiddi hópinn því ég fór þarna síðasta haust og öllum hólum kunnug. Fór á okkar fjallabíl og skemmti mér konunglega á 10 km "óbyggða" kaflanum að bílastæðinu.

Síðasta miðvikudag fórum við þrjár úr saumaklúbbnum í ferð með Útivistarræktinni á Vífilsfell. Það var frábær ferð. Veðrið dásamlegt og útsýnið stórkostlegt (kann ég ekki mörg lýsingarorð?)

Í gærkvöldi ákvað ég að skella mér ein upp á Esju til þess að prófa nýju gönguhækjurnar mínar (stafi). Mér fannst útlitið ekki svo bjart þegar ég kom því það var þoka yfir hálfu fjallinu. Ég ákvað samt að drífa mig. Tók nokkuð vel á því og komst upp að Steini á 47.01 mín. Ég hefði án efa getað verið aðeins fljótari því ég sá ekki alveg hvaða leið var hagstæðust þegar ég fór að nálgast steininn (vegna þokunnar auðvitað). Þegar nokkrir metrar voru að takmarkinu komst ég allt í einu út úr þokunni og við mér blasti alveg mögnum sjón: Skýjabreiða eins langt og augað eygði. Alveg eins og maður sér í flugvél. Auðvitað var ég ekki með myndavélina :-(.
Ákvað að fara upp á topp og skrifa í gestabókina. Mér fannst það ansi djarft hjá mér en ef maður fer varlega þá er þetta örugglega í lagi. Var frekar skúffuð þegar ég ætlaði að draga gestabókina fram (það var svo almennileg bók á Vífilsfelli) því úr hólknum komu bara krumpaðir miðar.
Var ekki svo lengi niður þegar ég komst niður úr klettunum, hljóp meira að segja smá spotta.
Lagði ekki í segja múttu ferðasöguna því hún hefði sagt að ég væri rugluð! Ein upp á Esju í þoku!

Var ferlega ánægð með mig og nú er stefnan á aðra ferð fljótlega og komast þá á 45 mín. Þá ætla ég ekki að hafa bakpoka með jakka sem ég fer aldrei í.

Er ótrúlega lítið eftir mig í lærunum eftir þetta. Aðallega blöðrur á stórutám sem eru óþægilegar.

Adios fjallageitin.

P.S. Ég er samt ekki hætt að hlaupa!

N1

2007-06-01T00:09:00.000+02:00

Halló allir!

Get svarið það ég er að blogga í fyrsta skipti í þessum mánuði.
Ég er enn og aftur haldin svona blogg minnimáttarkennd. Mér finnst allir blogga svo gáfulega og skemmtilega að mitt blogg verður álíka spennandi og símaskráin. Núna er ég búin að taka ákvörðun: I don't give a f....

Nú er maí að verða búinn og ég verð að segja að þetta er búinn að vera fínasti mánuður.
* Við hjónakornin skruppum í barnlausa ferð til Glasgow í byrjun mánaðarins. Það var aldeilis fínt og alveg nauðsynlegt fyrir barnafólk (svona eina sinni á ári). Versluðum, fórum fínt út að borða og spókuðum okkur.
* Garðvinnan gengur vel. Garðurinn lítur bara nokkuð vel út. Eitt stykki risaösp var felld um daginn og nú eru bara 5 eftir. Læt gera það í haust þegar ég stel ekki garðyrkjufólki nágrannas í verkið.
Ætla að kaupa slatta af blómum á morgun.
* Margir frídagar :-)
* Hlaupaæfingarnar eru byrjaðar aftur. Er ekki búin að vera dugleg að mæta en er búin að fylgja prógramminu heima.
* Eiginmaðurinn spænir um allan bæ og sveitir á reiðhjólinu (hóst: Glæsilega fjallahjólinu sínu) og heldur að hann sé að æfa fyrir Tour de France. Ef þið sjáið gulan depil bregða fyrir á hjólreiðastígum á stór-Reykjavíkursvæðinu þá er það umræddur eiginmaður.
* Sumarveðrið er að lagast.
* Bara bjartsýn á að júnímánuður verði góður.

Kveðja, Garðálfurinn

Tómstundir barnanna...

2007-04-24T00:21:00.000+02:00

Ágætishelgi að baki. Vorum með óvænt "sammenkomst" á föstudagskvöldið. Þar voru mættar mágkonur mínar með mökum og svo býr tengdapabbi hér meðan hann er að vinna á landinu.
Við fengum okkur rauðvín og osta og tókum svo Buzz í playstation. Hver segir að það geti ekki verið gott að eiga playstation?? Við hjónin sigruðum báðar keppnirnar en það þarf alltaf breitt bak til þess að geta tekið commentunum sem maður fær þegar sá sem á leikinn vinnur. En ótrúlega gaman að hittast svona.

B er byrjaður að æfa knattspyrnu. Ég fór með hann á fyrstu æfinguna í síðustu viku. Fram til þessa hafði pabbinn alltaf farið með hann. Þar voru feður í meirihluta að fylgja sonum sínum á æfingu.
Í dag byrjaði svo dóttirin á örstuttu vornámskeiði í Ballett. Þar voru BARA mæður að fylgja dætrum sínum. Að vísu kom einn afi með barn á næsta námskeið á eftir.
.
B var með en ætlaði varla að vilja koma yfir þröskuldinn því að þetta var stelpustaður. En um daginn þegar E kom með í fótboltann langaði hana svo að taka þátt.

Hm..... dálítið fyndið

Gleðilegt sumar!

2007-04-20T00:18:00.000+02:00

Dásamlegur dagur í dag.
Sól og blíða þar sem lognið var.
Fórum í Íshesta í Hafnarfirði og krakkarnir fengu að sitja á hesti 2 hringi í gerðinu. Bara frábært og þau alveg í skýjunum.
Skruppum svo aðeins í bæinn. Kíktum í Þjóðmenningarhúsið á náttúrulífsmynd. Þolinmæðin dugði í 1/2 mynd um sel og 1/eitthvað lítið um hunda.
Urðum svo að líta á brunarústirnar. Úff, þetta var dálítið dapurt. Mér finnst verst með græna hornhúsið. Mér hefur alltaf fundist það svo flott.
Ætluðum á kaffihús kennt við París, en þar var þjónustan engin og við gáfumst upp. Fórum frekar í Perluna og fengum okkur ís.
Tengdapabbi og mamma voru í mat. Krökkunum fannst furðulegt að fá ömmu og afa í mat en samt voru þau ekki sama settið.

Góður dagur :-)
Sumarkveðjur

Dekur með stóru D-i

2007-04-17T22:24:00.000+02:00

Ah... ég fór í dekur á Nordica á laugardaginn. Vinnan var með árshátíð og bauð kvenfólkinu í dekur.
Við fórum í pottinn þar sem við fengum herðanudd.
Ég valdi mér nudd og andlitsbað. Fór fyrst í nuddið. VÁ hvað það var geggjað. Hugsa að ég gæti alveg vanist því að fara reglulega í nudd. Þetta var víst klassískt nudd og var ég nudduð frá toppi til táar. Andlitsbaðið var sko ekki síðra, nudd þar líka. Þegar herlegheitin voru búin var ég svo slök að ég ætlaði varla að meika það að standa upp. Druslaðist samt í sturtu og uppgötvaði að ég hafði gleymt sjampóinu. Ekki sniðugt þegar maður er með nuddolíu í hárinu, en well allar hinar höfðu líka gleymt sjampói.
Eftir þetta fórum við á kaffihús og fengum okkur súpu. Bara æði.
Kvöldið var líka fínt, allt í rólegheitunum, frábær matur og skemmtilegt fólk.
Það sem ég lærði af þessu er nú ætla ég að dekra við mig reglulega. Eitthvað meira en litun og plokkun sem seint verður talið til dekurs :-/. Næst á dagskrá er fótsnyrting.

Allt fínt að frétta af okkur.
Hafði það af að klippa frumskóginn minn í páskafríinu. Það kemur svo bara í ljós þegar laufin fara að koma hvernig til tókst.
Af hverju er ekki til almennileg uppflettibók um trjáklippingar?? Mig vantar svoleiðis.

Adios...

2007-03-20T13:14:00.000+02:00

Einhvern veginn hef ég gleymt að blogga, gleymt lykilorðinu mínu og verið í bloggóstuði. EN eftir að ég missti af kaffhúsaferð vegna bloggleti ákvað ég að drífa mig og henda inn svosem eins og einni færslu.

Ég er heima með lítinn lasarus sem er á batavegi. Ég ákvað að vera góða mamman og fara í playstation leik með syninum og kynna mér það sem hann er að gera í tölvunni. Mér fannst mér ganga mjög vel og náði að hoppa, skjóta og safna mér inn stigum.
B: "Mamma, þú ert verri en barn í þessum leik". Hætti fljótlega eftir þetta, en komst að því að sonurinn er snillingur í þessum leik (Starwars lego).

Mér er að takast að koma hreyfingunni inn í dagskrá dagsins. Minn tími er kl.6.00 á morgnana. Kem heim aftur um kl.7, næ að fara í sturtu, borða og lesa Moggann áður en familían er vakin. Mér finnst ég reyndar algjör hetja að geta vaknað kl.5.40 og farið í ræktina. Stundum þarf 10 fíla til þess að toga mig fram úr en um leið og höfuðið hefur lyfst 1 cm frá koddanum er eftirleikurinn auðveldur :-)

Síðan síðast er ég búin að fá nýjan I-pod og hann er BLEIKUR.

Dánarfregn

2007-02-13T23:19:00.000+02:00

Í gær uppgötvaði ég að I-podinn minn var ekki að svara skipunum mínum. Reyndi hvað ég gat að koma honum af stað, en allt kom fyrir ekki: Hann er steindauður. Tölvan fann hann ekki einu sinni þegar ég reyndi að gera eitthvað.
Það skal tekið fram að hann er að skríða í árs afmælið sem mér finnst nú ekki svo mikið. Hef reyndar tekið eftir því upp á síðkastið að hleðslan dugaði ekki lengi.
Kannski var sökudólgurinn nokkrir vatnsdropar sem hafa lekið úr vatnsbrúsanum mínum í töskuna. Trúi því samt eiginlega ekki því I-podinn minn var í hulstri.
Ótrúlegt hvað svona lítið tæki getur allt í einu orðið ómisandi.

Ég VERÐ að fá nýjan sem fyrst. Best að klappa eiginmanninum áður en hann fer til útlanda þar sem þeir fást fyrir miklu minni pening en hérna. Blikk blikk ;-)

Bloggi bloggi

2007-01-31T23:02:00.000+02:00

Halló!
Er með bloggleti. Málið er það að mér finnst annar hver maður vera að blogga. Man ekki hve mörg þúsund eru með mbl. síðu. Mörg blogg eru þrælskemmtileg og fullt af hæfileikaríkum pennum að skrifa en það eru líka til fullt af lélegum bloggurum sem eru að reyna að skrifa eitthvað gáfulegt og koma með einhverjar frammúrstefnulegar skoðanir en eru því miður ekki að gera sig.
Held ég flokkist í þann hóp bloggara sem finnast þeir aldrei hafa neitt skemmtilegt að skrifa en pikka eitthvað smá inn öðru hvoru.
Jæja, hætt þessu röfli.

Ég er byrjuð nýtt líf eftir að ég skipti um vinnu.
Núna er öll fjölskyldan róleg á morgnana, engin klukka til að keppa við.
Húsmóðirin kemur slök heim og hefur fulla orku til þess að takast á við heimilislífið.
Bara gott :-)
Nú er ég að ljúka síðustu verkefnum í skólanum, skila lyklunum og þá er þetta búið.
Adios....

Nýtt ár :-)

2007-01-01T20:25:00.000+02:00

Gleðilegt nýtt ár!
2007... time flyes.
Nýtt ár og ný fyrirheit og tími til að staldra við og líta um öxl. *lít um öxl*
Árið 2006 var stórgott fyrir mig og mína og ég er viss um að árið 2007 verði enn betra.
Helstu atriðin á liðnu ári:
Fluttum í draumahúsið og þrátt fyrir tvísýnu í peningamálin reddaðist allt á endanum.
Sagði upp í vinnunni
Fékk nýja vinnu.
Mínir nánustu eru við góða heilsu
Eignaðist lítinn frænda í maí
Hætti að drekka svart gos 28.febrúar (já, þetta er hægt)

Markmið á nýju ári:
Vera dugleg að hlaupa. Ætla að bæta mig umtalsvert á þessu ári.
Horfa minna á sjónvarpið
Lesa fleiri bækur
Svo allt þetta dæmigerða: Vera góð mamma, eiginkona og hugsa um sjálfa mig :-)
Minna göfugt: Kaupa mér fleiri skó og fleiri snyrtivörur.

Megi árið 2007 færa ykkur gæfu og gleði :-)

Jólin eru að koma :-)

2006-12-23T11:09:00.000+02:00

Afsakaðu allan þenna reyk inni,
ég var bara að líta til með steikinni
hún er meir og mjúk
alveg eins og hugur manns.

Við hjónin erum búin að æfa þetta lag og getum tekið það hvar sem er (helst eftir tvö rauðvínsglös).
Baggalútur er bara snilld. Ekki hægt annað en að komast í jólastuð við að hlusta á þá.

Eftir allar hremmingarnar (sprungið snjóbræðslurör og vatn úr helv.. dælunni undan vaskinum í kjallaranum yfir allt nýlagða parekttið - allt of löng saga, verðið bara að hringja í mig til þess að fá "full version" ) síðustu daga erum við að verða tilbúin fyrir jólin. Vorum að langt fram eftir kvöldi við að koma lagi á fataherbergið Jebb ég á fataherbergi eins og í bíómyndunum en það er vegna þess að það eru engir skápar í húsinu.
Dagurinn í dag verður notaður í ýmsar útréttingar. Fara í Bónus, fara í kirkjugarðinn, setja upp jólatréð, skreyta pínu meira, ofl. ofl.

Við eigum eftir að hlusta á Þorláksmessulagið svona 10 sinnum dag :-)

Hafið það gott.

5 dagar

2006-12-19T14:08:00.000+02:00

Bara 5 dagar til jóla. Þrátt fyrir fögur fyrirheit er ég ekki búin að kaupa allar jólagjafirnar (vantar 4). Ég er heldur ekki búin að búa til jólaísinn en ég er búin að kaupa allan rjómann sem fer í hann. Ég er langt komin með jólakortin.Er þetta ekki bara allt í lagi.

Byrja í jólafríi á morgun eftir hádegi þannig að þá hef ég nægan tíma til að dúlla mér að kaupa afganginn.

Skyrgámur fékk heldur betur góðar móttökur þegar hann kom til að setja í skóna í nótt. Fékk skyr frá Elísu (skyr.is með perubragði, kom ekki annað til greina) og skilaboð frá syninum. Hann langar svo mikið í eitthvað pödduslím (mjög jólalegt en hann er allur í slímum; prumpslími, pödduslími og ég veit ekki hvað). Ætli bjúgnakrækir verði ekki að fara í Kringluna á eftir og finna þetta pödduslím?

Njótið síðustu dagana fyrir jólafrí :-)

Stúfur

2006-12-13T23:15:00.000+02:00

Stúfur kemur í nótt :-) Mikið er þetta nú skemmtilegt hlutverk sem foreldrar hafa. Ég er alveg viss um að foreldrar hafa fundið upp þetta gefa í skó dæmi. Þvílíkt tak sem þessir jólasveinar hafa á börnunum.

Pirr dagsins: Einhver jólasveinn keyrði á bílinn fyrir utan World class í Laugum í hádeginu á mánudag. Sá hinn sami er ekki enn búinn að hafa samband (sénsinn). Hvaða fífl gerir þetta? Þetta er ekkert lítil beygla! Samkvæmt mínum útreikningum hlýtur þetta að hafa verið jeppi. Bara fúlt.

Stefni að því að vera búin að öllu jólastússi næstu helgi. Ætla meira að segja að skella í jólaísinn, klára jólakort og allt það. Svo er bara að njóta lífsins.
Þetta verður væntanlega síðasta almennilega jólafríið mitt í langan tíma. Jebb, mín bara að fara að breyta til.

Jólasveinakveðja :-)

Magapest..

2006-12-05T12:15:00.000+02:00

Úff dagur 4 í veikindum. Ég hef ekki orðið svona veik í háa herrans tíð. Ég var svo "þreytt" á laugardaginn að ég var með beinverki. Hehehe.. ákvað ekki að mæla mig fyrr en á laugardagskvöldið og var þá komin með háan hita. Fatturinn dálítið langur.
Anyway.. ég er búin að vera með magapest frá helvíti og háan hita með. Gríðarlega skemmtilegt eða þannig.
Ótrúlegt hvað orkan er fljót að fara þegar mataræðið er sama og ekki neitt. Er alveg eftir mig þegar ég labba milli hæða.
Vonandi er þetta að verða búið.

Í dag eru bara 19 dagar til jóla. Ég sé ekki fram á að:
Föndra fyrir jólin - aldrei þessu vant
Baka 7 sortir
Gera konfekt
Gera heimatilbúin jólakort
Kaupa kertin í aðventukransinn minn fyrr en næstu helgi

Get þó státað mig af því að hafa sett upp pakkadagatal fyrir krakkana í fyrsta skipti.
Ég saumaði það út þegar ég var í barneignafríi (fyrir óralöngu síðan) og gleymi því aldrei hversu mikil vinna fór í það.
En mikið svakalega eru krakkarnir ánægðir með þetta! Finnst þetta allt svo spennandi :-)

Í staðinn:
Fá allir keypt jólakort,
verða bakaðar piparkökur þegar húsmóðirin kemst á lappir
Lion bar kökurnar verða líka bakaðar,
Konfektið verður keypt
Eiginmaðurinn er búinn að hengja upp seríur á húsið
Hann er líka að mála í kjallaranum og ætlar svo að parketleggja vinninginn minn (sjá færslu á undan)

Bless í bili,
Farin að slappa af :-)

Heppni!

2006-11-15T11:01:00.000+02:00

Ég er búin að vera alveg gríðarlega heppin undanfarið.
Hef unnið hvorki meira né minna en: 25% afslátt á Lækjarbrekkur, 2 fyrir 1 á vídeóleigu sem ég hef ekki hugmynd hvort er í Keflavík eða Reykjavík, frí litun og plokkun EF ég fer í vax. Þessa stórgóðu vinninga hef ég unnið á Núinu.
Ég fékk reyndar frábæran vinning á Bylgjunni um daginn. 150.000 krónur úttekt í parketverslun. Kemur sér mjög vel því planið var að parketleggja í kjallaranum á næstu 10 árum. Nú sé ég fram á að fataherbergið og dótaherbergi eiginmannsins verði parketlagt fyrir jól.
Ég er margbúin að sanna það að maður vinnur ekki nema taka þátt :-)
Nú væri frábært að vinna í Lottóinu, sem ég tek reyndar mjög sjaldan þátt í. Við erum með 2 raðir í áskrift það er allt of sumt.

Frost...

2006-11-14T23:01:00.000+02:00

Hélt aldrei að ég myndi segja þetta: Það var mjöög hressandi og fínt að fara að hlaupa í frostinu :-) Alltaf æðislegt að hlaupa í Laugardalnum.
Hef nefninlega ekki mætt í 2 vikur :-/ vegna ýmissa aðstæðna.

P.S. Búin að fá tölvupóst frá Blóðbankanum. Vilja endilega fá mig í heimsókn :-) er ekki alveg gleymd.

London :-)

2006-11-12T13:50:00.000+02:00

Farin og komin aftur eftir frábæra London ferð. Þetta var húsmæðraorlof með stóru H-i hjá mömmu og mér. Fórum í "nokkrar" búðir, söngleik, út að borða og fleira í þessum dúr.
Mikið svakalega þykir mér gaman að fara í búðir í útlöndum! (Ef þið vissuð það ekki). Allt til í öllum stærðu, þjónstan góð (ekki í mínus eins og hér).
Verst að það má bara fara með eina ferðatösku.
Á heimleiðinni lentum við í 12 tíma seinkun eftir óveðrið hér. Það var upplifun út af fyrir sig. Við áttum flug kl.13.00. Þegar við tékkuðum okkur inn var okkur strax sagt að það væri seinkun til 16.00. Klukkan 16.00 var seinkað til 19.00. Klukkan 20.00 kom upp að seinkunin væri til 23.00. ÚFF. Um kl.23. vorum við kölluð út að hliðinu og það endaði með því að við fórum í loftið 0.30.
Ef einhver vill fá upplýsingar um hvaða verslanir, matsölustaðir eru á Heatrow terminal 1, hafið endilega samband við mig.
Sem betur fer eru Flugleiðir nýbúnir að skipta yfir á terminal1 frá nr.2 þar sem ég fór síðast. Þar er nefnilega ekkert um að vera.

Ég var með langan lista yfir það hvað ég ætlaði að gera á mánudaginn því ég átti vetrarfrí, en dagurinn var ónýtur hjá mér vegna svefnleysis :-/ Finnst Flugleiðir skulda mér einn frídag.

Farin að skipuleggja næstu verslunarferð :-).. .hehe...

Nobody....

2006-10-16T16:55:00.000+02:00

Ég er búin að komast að því að ég er "nobody". Eða nobody is perfect and I'm nobody.... þetta var bara smá útúrdúr.
Ég skráði nafn mitt fyrir 6 vikum á spjald á sýningu þar sem ég óskaði eftir því að fá hringingu um heimavörn Securitas. Enginn búinn að hringja. Hitt er svo annað mál að ég er búin að kynna mér málið og ætla alls ekki að fá mér þessa heimavörn, en það er önnur saga.
Á sömu sýningu skráði ég nafn mitt á spald þar sem ég sagðist hafa áhuga á að verða blóðgjafi. Blóðbankakonana sagði að það yrði örugglega haft samband við mig því það vantar svo marga blóðgjafa. Enginn búinn að hringja. En ég er alveg ákveðin í því að fara í blóðbankann við tækifæri því mér þykir svo gaman að láta pína mig með sprautum. Nei, án gríns þá lít ég á það sem samfélagslega skyldu mínu að gefa blóð ef ég get það.

Semsagt: Ég er hætt að segja nafnið mitt í pott og bíða eftir því að vinna eitthvað eða að það verði haft samband við mig. Ég skipti semsagt engu máli.
Einu vinir mínir núna eru frambjóðendurnir í prófkjöri Sjálfstæðisflokksins, þeir hringja í mig og vilja fá atkvæðið mitt. Þar skipti ég máli.

Þetta er nú meira bullið í mér.... kannski er þetta mánudagsletin á mjög háu stigi sem kemur svona út?????

P.S. Ég er búin að kaupa mér nýja hlaupaskó. Hálfu númeri stærri en þeir gömlu og það er sko allt annað að hlaupa í þeim. Engar blöðrur!!!!

Húsmóðir með stóru H-i

2006-09-18T00:58:00.000+02:00

Fékk fast skot frá litlu systur um að ég væri svo dugleg að blogga. Eða þannig sko.
Satt best að segja er að velta því fyrir mér að hætta þessu. En svo hugsa ég að kannski lesi litli bróðir hvað stóra systir er að gera svona dags daglega eða að systir mín kæmist að einhverju sem ég gleymi að segja henni í daglegu símtölum okkar.

Anyway.... ég var ekkert smá mikil húsmóðir í dag. Bakaði skúffuköku í kaffinu og svo var læri með öllu í kvöldmatinn. Ef þetta er ekki að vera mikil húsmóðir þá veit ég ekki hvað! Börnin kunnu svo sannarlega að meta þetta skúffukökuframtak.

Skrapp út í hlaupatúr í dag. Finnst alltaf jafn skemmtilegt að hlaupa upp "brekkuna" sem ég komst upp í 3 áföngum um páskaleytið í fyrra. Nú flokkast þetta ekki sem brekka heldur örlítill aflíðandi halli. Já, það er alveg æðislegt að finna mun á sér. Nú er Glitnis hópurinn minn kominn á fullt aftur. Nú verður áherslan sett á að bæta hraðann sem ég er sko alveg til í! Fyrsta hraðaæfingin var sl. þriðjudag. Voðalega eru 400 metrar langir! Nú lít ég allt öðrum augum á 400 m hlaup á frjálsíþróttamótum.
Nú verð ég að fara að fjárfesta í nýjum skóm. Í þetta skipti ætla ég að kaupa mér skó í réttu númeri. Ég er búin að fara í smá göngugreiningu og kynna mér málið. Nú þarf ég að druslast í Útilíf og kaupa skóna.
Þegar ég hljóp í dag með U2 lagið Beautiful day í eyrunum hugsaði ég hvað ég væri nú heppin að geta hlaupið. Það eru ekki allir jafn heppnir og ég. Það eru búin að vera tvö alvarleg slys á fólki í kringum mig á stuttum tíma sem fær mann ósjálfrátt að þakka fyrir það sem maður hefur.

Carpe diem :-) Njótið dagsins! Maður veit aldrei hvað morgundagurinn ber í skauti sér!

Aumir vöðvar

2006-08-21T01:34:00.000+02:00

Náði að hlaupa 10km. Ég stóð mig bara nokkuð vel þó svo að ég náði ekki tímanum sem ég setti mér. Ætlaði að hlaupa á 57mínútum. Hlaupið byrjaði vel, hélt mínum hraða og ég var í góðum gír. Þegar ég kom út á Norðuströnd var eins og ég hlypi á vegg (eða kannski var það rokveggur, ég veit það ekki). Ég átti eitthvað svo erfitt með mig frá 6-8km. Það var töluverður vindur en það var aðallega að sjá þessa löööngu leið sem var framundan. Ég náði að herða mig upp og komast í mark undir klukkutímanum. Ég bætti mig um 3 mín frá því í fyrra :-). Ég held bara áfram að bæta mig næst. Nú ér ég búin að setja mér ný markmið. Ekkert verður gefið upp hér nema það að ég ætla að halda áfram að hlaupa í vetur.

Við fórum svo í Latarbæjarhlaupið. Get svo svarið það að ég er aumari í líikamanum eftir það hlaup en eftir 10km. Ég vaknaði í morgun stíf í hálsinum með eymsli í herðunum. Það er ekkert smá átak að hafa 17 kg á öxlunum á háhesti.
Krakkarnir skemmtu sér hið besta og þetta var skemmtilegur dagur, er það ekki fyrir mestu?

Sé fram á annasama viku í byrjun skólaársins, undirbúning kennslu ofl. ofl.

Góða nótt.

Latarbæjarhlaupið

2006-08-19T01:11:00.000+02:00

er á morgun. Það er mikil spenna á mínum bæ. Aðal spenningurinn er hvort Glanni glæpur laumi sér í hlaupið :-)

Ég ætla samt fyrst aðeins að hlaupa 10 km. Ég er ekkert stressuð fyrir þetta því ég gat þetta í fyrra og núna er ég í betra formi.
Aðal höfuðverkurinn snýst um það í hverju ég á að vera, hvað ég á að borða í morgunmat, hvenær þarf ég að vakna, hvar á ég að leggja???

Ætla að fara að sofa bráðum og vakna svo kl.6.50 í fyrramálið, fá mér Special K og ákveða allt hitt.
Þetta verður bara gaman. Er meira að segja búin að skella nýju lögum á I- podinn.

Hlaupakveðjur :-)

21/2 dagar eftir

2006-08-10T11:53:00.000+02:00

Stundin nálgast óðfluga. Eftir nákvæmlega 4 daga (2 og hálfur virkir) fer ég að vinna aftur eftir sumarfríið. Tilfinningin er bæði góð og ekki svo góð. Mér finnst spennandi að takast á við ný verkefni, nýtt námsefni og unglingana og svo á hinn bóginn finnst mér alveg sérlega gott að vera í fríi með sjálfri mér.
Svona er þetta bara. Ætli maður yrði ekki hundleiður á því að vera ekki í vinnu? Held það.

Ég lærði fullt af nýjum orðum í gærkvöldi. Ég las yfir 25 blaðsíður af lokaverkefni "litla bróður".
Ég var svo fegin þegar ég sá kunnugleg orð eins og lotukerfi. Hugsa sér að litli bróðir manns er að fara í mastersnám til ÚTLANDA!!! Sé fram á góða afsökun til þess að þurfa að fara í heimsókn til Köben í tíma og ótíma (hef reyndar ekki þurft neinar afsakanir fram að þessu).

Við hjónin fjárfestum í glæsilegum reiðhjólum á föstudaginn. Þetta er búið að standa til lengi og hefur undirrituð ekki átt hjól í ca 12 ár. Við erum óþægilega mikið í stíl á þessum hjólum (var einhver að tala um hjón í krumpugalla í stíl?), en samt um leið mjög sportleg.
Nú eru komnir skemmtilegir hlutir á óskalistann: Hjólagrifflur og vatnsbrúsi :-)

Jæja, ekki nema 8 dagar í Reykjavíkurmaraþonið. Er bara spennt að hlaupa og sjá hvað ég get bætt tímann minn frá því í fyrra. Stefni að því að bæta mig um 5 mín. Áfram ég.

Mér finnst Latabæjarjhlaupið sérlega vel til fundið og ætlum við að fjölmenna. Fæ samt nokkra tíma til að jafna mig milli hlaupa. Þetta verður örugglega skemmtilegt. Allaveganna mikil spenna á mínu heimili fyrir þetta hlaup.

Hjólakveðjur......

Komin aftur

2006-08-03T00:38:00.000+02:00

Færslan í dag verður í skeytastíl:

Veiddi 2 fiska.
Veðrið var meiriháttar.
Var hrikalega svöl með veiðihattinn.
Kem heim þreytt en heilinn á mér er úthvíldur.
Efst á óskalistanum núna eru vöðlur og flugukastnámskeið :-), en ég hef nógan tíma til að verða mér út um þetta því ég fæ víst ekki að fara með fyrr en árið 2008 nema e-r bjóðist til að passa krakkana næsta sumar.

Meira síðar.

Ég fer í fríið... ég fer í fríið.. trallalala

2006-07-31T12:30:00.000+02:00

Ég er að fara í ca 50 klukkustunda áreitisfrí. Ég er að fara á stað þar sem er ekkert útvarp, engin tölva, gsm samband mjög stopult, börnin mín verða heima og eiginmaður. Ég ætla bara að hlusta á umhverfishljóð og fagnaðarhróp þegar fiskur bítur á.

Ég er að fara langt upp á hálendi í árlega veiðiferð familíunnar. Eftir að börnin fæddust höfum við þurft að skiptast á að fara og nú er röðin semsagt komin að mér. Þau ættu að geta komið með eftir svona 2 ár.

Ég er búin að fjárfesta í svakalega smart veiðhatti sem er með innbyggðu flugnaneti. Splæsti líka í úlnliðshlífar (svitabönd) til þessa að setja utan yfir peysuermarnar svo flugurnar geti ekki smeygt sér inn þar. Það er nefninlega sá möguleiki að það verði mikil fluga þarna og ég er sérlega gómsæt á bragðið.

Aflatölur verða settar inn á miðvikudagskvöldið :-)

Veiðkveðjur

Sól sól skín á mig...

2006-07-19T23:13:00.000+02:00

Ský, ský burt með þig.....
Það kom að því. Hélt að ég sæji ofsjónir í morgun þegar ég sá sólargeislana troða sér á milli rimlanna. :-).
Krakkarnir og ég áttum góðan dag. Fór með þau í Sportlandið í morgun við miklar vinsældir. Þau fá að fara svo sjaldan þangað að þeim þykir ægilega mikið sport að fara.
Uppgötvaði of seint að ég hefði getað tekið sundfötin með. Geri það næst. (á föstudaginn??)

Ég var með nýjan vatnsbrúsa í dag (takk Glitnir). Var búin að hlaupa í 10-12 mínútur á ágætum hraða og þurfti að súpa á vatninu. Það vildi ekki betur til að ég hef ekki smellt lokinu á nógu vel þannig að það sullaðist vatn út um allt! Ég var bara svöl og lét eins og ég hefði oft lent í þessu áður, þurrkaði sullið og hélt áfram. Er þetta ekki dæmigert fyrir mig???

Ég má til með að mæla með bók sem ég var að klára. Flugdrekahlauparinn. Þetta er ein magnaðasta bók sem ég hef lesið í langan tíma. Ég hefði aldrei lesið hana nema að því að mamma sagði mér að lesa hana. Las aftan á hana.. eitthvað um vináttu og Afganistan, það hefði verið nóg til þess að ég hefði aldrei lesið hana.
Semsagt: Frábær saga, sérstaklega vel skrifuð og hefur áhrif á lesandann. Ef þú lest eina bók á ári, lestu þessa.
Ég er að hugsa um að lesa James Patterson næst, svona heilalausa spennusögu.

Kveðja til allra með sól í hjarta :-)

Sól og blöðrur

2006-07-07T14:00:00.000+02:00

Mikið er gaman að vera til í dag. Sólin loksins farin að láta sjá sig :-) Því miður eru veikindi á heimilinu þannig að dagsferð fjölskyldunnar frestast aftur.

Ég hljóp 8 km í gær. Nokkuð gott hjá mér svo ég grobbi mig aðeins.
Ég er því miður að deyja í fótunum. Blöðrur... djö.... nýju Nike skórnir hafa ekki alveg verið vinir mínir, en það getur verið að ég þurfi að kaupa mér eitthvað innnlegg í þá. Þeir eru góðir en aðeins of víðir á mér, lengdin er fín.
Hef verið að hlaupa í gömlu asics skónum en þeir voru vondir við mig í gær. Gæti verið að ég þyrfti að fá eithverja aðstoð við að velja rétta skó. Nenni þessu ekki lengur.

Jæja, farin út í góða veðrið að klippa dauðar trjágreinar.

P.S. Skil núna hvers vegna ég fékk nokkur olnbogaskot í Jónsmessuhlaupinu. Ef þið skoðið myndir frá startinu sést undirrituð fremst í flokki. Fyndið.....þeir sem hafa verið fyrir aftan mig hefur legið svona rosalega á að komast áfram.

Ekki er ráð nema í tíma sé tekið

2006-06-26T18:07:00.000+02:00

http://dyraland.is/messageboard/messageboard.aspx?advid=4245378&advtype=3&page=1

Þessi auglýsing skýrir sig sjálf :-)

Jónsmessa

2006-06-25T01:04:00.001+02:00

Út í nót að velta sér upp úr dögginni. Er það ekki málið???

Fór í Jónsmessuhlaupið í gærkvöldi. Þetta er í þriðja sinn sem ég tek þátt í því. Skemmtilegt hlaup og góð stemning. Veðrið í gær var mjög hentugt hlaupaveður :-) fyrir 5 km mína.
Var fyrir ofan miðju í mínum aldursflokki og er bara ánægð með það. Ég ætlaði að hlaupa á aðeins betri tíma en ég endaði á. Ég fékk nokkur olnbogaskot þegar hlaupið var ræst sem sló mig aðeins út af laginu. Fyrir hlaupið hittist hlaupahópurinn minn og tók "létta" upphitun fyrir hlaupið. Ég held því miður að þetta hafi verið aðeins og þung upphitun. En... lélegir íþróttamenn kenna öðrum um, ég hef bætt mig sem er bara flott!!!
Í fyrra var ég búin að mæta á 3 hlaupaæfingar, hljóp 3 km skemmtiskokk í Jónsmessuhlaupinu og
ætlaði varla að hafa það af. (Stundum þarf ég að minna sjálfa mig á að líta á björtu hliðarnar).

Á morgun verður löng og róleg æfing... víííí....

Sumarfrí fjölskyldunnar er tæknilega séð byrjað. Við erum með langan lista sem fjölskyldumeðlimi langar til að gera.
Þar á meðal eru skriljón sundferðir og gönguferð á Esjuna. Sjáum hvað tvö 4 ára börn komast langt upp.

Góða helgi :-)

Latibær vs.Jói Fel

2006-06-16T01:37:00.000+02:00

Latibær er farinn í frí. Það varð mikil sorg á mínu heimili þegar það uppgötvaðist. Glanni glæpur og félagar búnir að vera fastir liðir á föstudagskvödum. Hátta og svo upp í sófa með sæng. Bara toppurinn.

EN..... þökk sé Jóa Fel sitjum við nú saman í sófanum á fimmtudagskvöldum. Krakkarnir eru alveg jafn límd yfir þessu og ég. B sagði í kvöld: Mamma, við erum ekki ennþá búin að baka skúffukökuna sem hann bakaði síðast! Verðum að gera eitthvað í því... hehe...

Um helgina verða grilluð humarspjót í forrétt og ekki kengúrusteik í aðalrétt. B stakk upp á því að það væri hægt að nota lambakjöt í staðinn. Í eftirrétt verður algjör gúmmelaði kaka. Sleeeef.

Ekkert mál :-) Vona að Jói vinur okkar verði búinn að setja uppskriftirnar inn fyrir helgi.

Jóa Fel kveðja,

P.S. Boston ferðin var ÆÐI. Meira um hana síðar.

HM HM HM HM HM

2006-06-09T12:55:00.000+02:00

Í dag byrjar HM fyrir þá sem ekki vita það.

Ég heyrði viðtal við fjölskylduráðgjafa í Ísland í býtið í vikunni. Hún var að ræða hvaða áhrif HM hefur á hjónabandið. Mér fannst þetta alveg ferlega fyndið því ekki er gert ráð fyrir að kvenmenn hafi nokkurn áhuga á knattspyrnu. Eitt sem hjón/pör geta gert er að ræða málin áður en HM byrjar. Spurningin er: Hvernig ætlum við að leysa það að þú (karlinn) ætlar að horfa á fótboltann? Þannig sparast pirringur og leiðindi.
Hún var búin að reikna það út að ef að horft er á flesta leikina, horft á 4-4-2 þættinga líka þá gera þetta um 40 stundir á viku. Þetta er alveg hellingur ofan á allt sem þarf að gera t.d. vinna.

Á mínu heimili er spurningin: Hvernig förum við að því að horfa á leikina. Aðal vandamálið eru leikirnir kl.5. Þá eru krakkarnir heima og þurfa sína athygli. Við erum búin að bjarga hinum tímasetningunum því við erum bæði í fríi.

Ég er ekki alveg búin að gera það upp við mig með hvaða liði ég ætla að halda, en ég er spennt að sjá hvað Englendingar gera. Þeir hafa alltaf verið í vandræðum á stórmótum.

HM kveðjur frá fótboltaeiginkonunni :-).

X-Ég

2006-05-26T22:41:00.000+02:00

Mikið finnst mér gaman að fylgjast með þessari kosningabaráttu. Kosningaloforðin ble....ble...ble... XB er að róa lífróður, eyða miljónum í auglýsingaherferð á einum manni. Svo sýna kosningar að hann er tæpur að vera inni. Verð að taka það fram að hann er gamall skólafélagi minn og ég eyddi heilu sumri í unglingavinnunni með honum. Ég er greinilega núll og nix því hann hefur ekki enn hringt í mig til þess að falast eftir mínu atkvæði.
Sjálfstæðisflokkurinn allt í einu orðinn bleikur... á sá hlýtur að höfða til femínista???

Og þvílík tilviljun að Kópavogsbær og Mosfellsbær sendi "endurgreiðslu" á fasteignagjöldum korteri í kosningar. Frábært!!!

Ég er að spá í að bjóða mig fram árið 2010.
Helstu stefnumálin eru:

Tengja göngustíga borgarinnar saman.
Lestarkerfi
Betri mat í skólana, hagræða í rekstri
Gera Laugarveginn að göngugötu
Koma á fót úrræðum fyrir nemendur með geðraskanir
Setja upp fleiri ruslatunnur
Taka upp sektarkerfi fyrir þá sem henda rusli út um gluggann á bílum
Frítt á öll söfn í Reykjavík
Endurskoða menntastefnu Reykjavíkuborgar frá A-Ö og fá fólk sem er í einhverjum tengslum við skólana að semja hana

Svo myndi ég hafa ýmis gæluverkefni: T.d.

Dýragarð
Vísindasafn
Skautasvell á Ingólfstorgi á veturna
Stóran og flottan skemmtigarð = Tívolí

Ég tek það fram að ég var ekki lengi að skutla saman einum svona lista.

Kosningaloforðslistinn fyrir Alþingiskosningarnar 2008 verða aðeins að bíða. Er að vinna í honum.

Ég mun mæta á kjörstað á morgun og nota minn kosningarétt og sitja síðan límd fyrir framan kosningasjónvarpið.... í alvöru... er ekki að grínast.

X-Ég

Sumar?????

2006-05-24T15:33:00.000+02:00

Lýst er eftir 10°c hita eða meira. Hlýrri sumargolu og sólarglætu. Ég bið ekki um meira :-/

Ég sendi krakkana í sokkabuxum og kuldaskóm í leikskólann í gær. Þau voru síðan ekki send út því það voru ekki öll börnin sem voru með föt fyrir þennan kulda.
Yngsta stigið í skólanum á að vera út um allan bæ í vorferðalögum en vegna veðurs er búið að fresta þeim þangað til í næstu viku. Þetta er náttúrulega ekki hægt.
Lét mig hafa það að hlaupa í gær. Mikið svakalega er erfitt að hlaupa í mótvindi, en ég kláraði hringinn og var frekar ánægð með mig!!!

Annars er frídagur framundan á morgun... vííííí... fer í óvissuferð með vinnunni á eftir en við vitum samt smávegis af óvissunni til þess að vera vel klædd.

Spakmæli dagsins: Á eftir kulda kemur hiti.

Bróderí

2006-05-22T23:11:00.000+02:00

Hlaupaferillinn fór í pásu þessa vikuna. Ég þurfti að fara í lýtaaðgerð á miðvikudaginn og læknirinn harðbannaði mér að fara í leikfimi. Ég spurði hann hvort ég mætti hlaupa og hann sagði nja.... það er ekki gott að svitna, það er alveg eins gott að fara í göngutúr. Best að gera eins og læknirinn segir, vil nú helst ekki fá ljót ör.
Saumarnir verða teknir á miðvikudaginn en ég ætla samt að fara á morgun.

Bara djók.. var ekki í lýtaaðgerð, var samt að spá í að biðja um að strekkja á magaskinninu í leiðinni. Ég er bara 5 fæðingablettum fátækari.

Helgin var fín hjá familíunni. Ég fékk lánaða saumavél hjá mömmu og náði að falda gardínur og laga Rúmfatalagers sænguverin sem krakkarnir eiga. Verkefnlistinn smá styttist. Nú er það næst að bera á pallana, bera á nýja garðhúsgögnin, slá grasið. Við erum nú ekki beinlínis í stuði fyrir útiverkin þegar þessi helv.. kuldi er. Vonandi náum við þessu á fimmtudaginn eða um helgina.

Bless í bili....

Glitnir

2006-05-15T23:48:00.000+02:00

Á morgun ætlar mín að byrja að hlaupa aftur í hlaupahópi Glitnis. Þetta verður sama fyrirkomulag og í fyrra. Mæta 2x í viku og svo hlaupa 2x í viðbót á eigin vegum.
Vegna heilsufarsástæðna hef ég ekki getað hreyft mig neitt að ráði síðust 2 vikur´en nú stendur allt til bóta.
Það tók mig heillangan tíma að peppa mig upp í hlaup í gær, en ég druslaðist út. Hljóp án vandræða Grafarvogshringinn á 27 mín. Sá ekki stjörnur og fékk ekki blóðbragð í munninn. Mæti galvösk á morgun :-) Gaman gaman. Er sko alveg viss um að ég eigi eftir að hlaupa betur með I-podinn. Setti meira að segja 20 og eitthvað ný lög inn á í gær í runner2 folderinn minn.

Hlaupamont kveðjur....

Maí

2006-05-08T23:29:00.000+02:00

Kominn tími á nýtt blogg.. er það ekki? Er alltaf á leiðinni að skipta um síðu en svo enda ég bara hér.
Nú verða sagðar fréttir:
Ég varð móðursystir í annað skiptið á fimmtudaginn :-) Systir mín valdi auðvitað flottustu dagsetninguna sem var í boði í maí: 04.05.06. Lítill prins er fæddur og kannski óþarfi að taka það fram að hann er algjör rúsína.

Nú er bara mánuður í skólaslit sem þýðir að næstu vikur verða frekar þéttar. Alltaf nóg að gera í skólalok en samt skemmtilegur tími því það styttist í sumarfríið. Ég er því miður að fara að skila af mér besta bekk sem til er. Veit ekki alveg hvað tekur við en það verða einhverjar smá breytingar.

Ég er nýbúin að uppgötva áhugamál sem ég vissi ekki að ég hefði: Garðrækt..Ég bíð spennt eftir að sjá hvað kemur í ljós í garðinum mínum, búin að hreinsa beðin, hlakka til að kaupa sumarblóm. Í gær voru keypt garðhúsgögn þannig að þetta er allt að koma.
En mikið svakalega er mikið af kóngulóm út um allt! Þetta eru ótrúleg vinnudýr... spinna og spinna út í eitt. Verst finnst mér þegar ég labba í gegnum vefinn... jakk..en annars eru þær ekkert fyrir mér.

Jæja, ætla að verða duglegri að blogga....

Bæjó..... blómálfurinn

FLUTTTTTT

2006-03-27T23:33:00.000+02:00

Nýjustu fréttir: Familían er flutt :-) Úff, þetta er búin að vera mikil vinna, en skemmtileg.
Í miðju kafi seldist íbúðin okkar þannig allt er bara að ganga upp. Orðatiltækið: Hlutirnir hafa tilhneygingu til að reddast :-) sannast í þetta skiptið.

Við erum ferlega ánægð með nýja heimilið. Er alveg viss um að okkur á eftir að líða vel hérna. Verð að fara á hraðnámskeið í garðaumhirðu því kunnáttan mín nær ekki lengra en að reita arfa. Ég átti agalega erfitt í fyrravor þegar ég var að velja sumarblóm á svalirnar mínar (n.b í eina körfu). Gat ekki ákveðið mig, hvernig haldið þið að verði þegar ég þarf að velja í mörg ker?

Adios amigos.

Heppin eða óheppin?

2006-03-14T22:32:00.000+02:00

Fékk póst í dag frá BA (British airways) um að ég hefði unnið ferð fyrir 2 í jómfrúarfluginu. Flug og hótel á 4* hóteli í 3 daga. Kampavín við brottför, einn dinner ...... sun-mið
Æði... eða þannig sko. Get ekki notað ferðina :-( Þetta er akkúrat flutningshelgin og svo er ég að fá kennaranema á mánudeginum. ÆJI... ég sem vinn aldrei neitt þarf akkúrat að vinna þegar ég get ekki með nokkru móti notað vinninginn.

Ekki þýðir að gráta Björn bónda. Þetta er nú einu sinni bara London, ég var þarna fyrir ári. (ein að sannfæra sjálfa sig).

Gleðitíðindin eru þau að við fáum húsið afhent á morgun :-) Spennandi!!!

Næstu 10 dagar fara semsagt í málingavinnu og kassaburð. Bara gaman.

Flensa, skensa...

2006-03-12T20:06:00.000+02:00

Helmingurinn af familíunni er með flensu. B var svo góður að veikjast í morgun þannig að þetta gengur þá væntanlega yfir á styttri tíma. Ég man hreinlega ekki hvenær þau voru veik á sama tíma síðast. Man eftir því þegar þau voru um 1 árs, annars ekki.
Við erum vel byrg af ýmsum tegundum af Svala og fleira góðgæti til þess að reyna að freista þeirra með.

Tökum einn dag í einu í skipulagningu. Ég verð heima á morgun. Hugsa að ég eigi inni a.m.k. 5 veikindadaga vegna barna. Ótrúlegt að maður fái 7 daga á ári sama hversu mörg börn maður á.

Fór út í göngutúr áðan með I-podinn minn :-) Fannst ég vera svaka pæja, þurfti að passa mig að syngja ekki hástöfum með.

Bæjó, spæjó....Flensumamma

Uppskriftir, veikindi, kassar ofl.

2006-03-10T16:47:00.000+02:00

Halló!
Hugsa að flensan hafi stungið sér niður á heimilinu. E vaknaði með 38.5°hita í morgun. Heppilegt að hún veikist á föstudegi, þá eru aðeins færri dagar sem þarf að plana í sb. við vinnuna.
Þegar kom í ljós að hún væri veik, var það fyrsta sem spurði: Fæ ég þá Svala? Frábært að geta glatt barnið sitt með einum Svala. Sýnir vel hve sjaldan Svali er á boðstólnum hér á bæ.

Á leiðinni heim kom ég við í Hagkaup til þess einmitt að kaupa Svala. Sá þá í mjólkurkælinum eldgamla uppskriftabæklinga frá Osta og Smjörsölunni. Hugsanlega hefur e-r verið að taka til og skellt þessu fram. Var svo kræf að ég tók allan bunkann (það var samt til annar eins). Náði mér í 51 uppskriftarbækling.... hóst...
Ég er aðeins búin að glugga í þessa fyrstu. Hér eru nokkur dæmi:

Nr. 1: Ostapinnar: Síðdegisboð og önnur smáboð eru næsta algengir viðburðir hér á landi. Ostapinnar njóta sívaxandi vinsælda sem veizlukostur.... Einhleypir karlar og konur geta veitt ostapinna jafnvel þó að aðgangur að eldhúsi sé ekki fyrir hendi.

Nr. 3: SKólanesti: ... Nestið þarf að vera í þægilegum og góðum umbúðum, snyrtilegt og lystugt. Bezt er að nota lítinn kassa sem kemst auðveldlega í skólatöskuna, og leggja smjörpappír milli brauðsneiðanna. Nett hitaflaska heldur kakóinu heitu og mjólkinni kaldri.

Nr. 4: Fiskréttir með osti: Í fáum löndum eiga húsmæður eins greiðan aðgang að ferskum fiski daglega eins og hér hjá okkur.

Ef einhver veit hvaða ár þessir fyrstu bæklingar komu út látið mig vita. Sá síðasti nr.51 kom út 1986 er úrval úr eldri bæklingum.
Giska á að þessir fyrstu séu frá 1970 eða þar um kring. Myndirnar eru kostulegar.

Ég er ekkert endilega að fara að elda upp úr öllum þessum bæklingum heldur finnst mér skemmtilegt að skoða þetta.

Býst við að helgin fari í það að pakka :-) , hjúkra og fara í World Class. Horfa á Idolið, hekla, og eitthvað fleira.

Kveðja, Húsmóðirin.

Aðdáendahópur

2006-03-07T16:15:00.000+02:00

Mikið er ég glöð að sjá að það að 6 kíkja á bloggið. Ég sem bjóst bara við tveimur. Takk takk, ég held þá áfram.

Vinsælasta spurniningin sem ég er spurð að í dag er: Ertu búin að selja?
Og svarið er NEI. Við reddum þessu þó svo að salan taki lengri tíma en við bjuggumst við. Ein var svo góð að spyrja mig hvort ég gæti ekki athugað hvort kaupin á húsinu gætu gengið til baka! DÖH.... á ég að hringja 2 vikum fyrir afhendingu og segjast vera hætt við? Og BTW borgið mér allar miljónirnar sem ég er búin að borga ykkur!

Við erum mjög spennt að fara að flytja í húsið. Það verður æðislegt að setja krakkana í sitthvort herbergið, eiginmaðurinn fær dótaherbergið sitt, já og garðurinn... júbbíí. Við erum meira að segja búin að segja já við að ættleiða Óla Palla, einstaklega ljúfan kött sem býr í húsinu okkar.

Ég er búin að pakka öllum bókunum (10 kassar) og 3 til viðbótar. Nú verðum við að láta hendur standa fram úr ermum um helgina. Ótrúlegt allt þetta dót sem maður sankar að sér.

Bara bjartir tímar framundan :-)

Ungrú bjartsýni 2006

Kvitta takk..

2006-02-21T15:28:00.000+02:00

Næstu vikuna ætla ég að gera könnun á því hverjir (eða kannski bara hvort) lesa bloggið mitt.
Vinsamlegast kvittið á síðuna.
Ég er spennt að sjá hvort fleiri en systir mín og mágkona lesa bullið.

Hlaupi hlaup :-)

2006-02-14T11:46:00.000+02:00

Fór út að hlaupa í gær :) Þokkalega ánægð með mig því ég fann það að ég hef engu gleymt. Hef bara verið að hlaupa á bretti síðan í haust. Fór þessa sömu leið um páskaleytið í fyrra. Þá var ég að hefja hlaupaferilinn... hóst.. hóst... Viðurkenni hér að ég var nær dauða en lífi eftir fyrstu brekkuna (eiginlega hæð). Fann blóðbragð í munninum og hjartað slá í höfðinu.
Í gær fór ég þessa leið eins og ekkert væri.

Ekki skemmdi fyrir að eiginmaðurinn þekkir spúsu sína vel og keypti handa mér I-pod nano í útlöndum. Var búin að búa til 1 hlaupalagalista. Ef einhver er með ábendingar um góð æfingalög vinsamlegast látið mig vita því ég er svo lengi að finna lög til þess að hlusta á.
Nú vantar mig bara armband svo ég geti spókað mig með þetta í WC.
Bara svöl!!!

Mont kveðjur frá mér.

Áfram SN :-)

2006-02-06T23:29:00.000+02:00

Þetta lag fær mitt atkvæði laugardaginn 18.febrúar. Ekki spurning!!
Er ekki tími til komin að senda eitthvað svalt lag???

Fyrir þann sem þekkir ekki Sylvíu Nótt þá er þetta ekki sérstaklega gáfulegur texti.

Hey þú, ógisslega töff, ég er að tala við þig.
Ég er Silvía Night
shining in the light,
ég veit þú þráir mig.

Born in Reykjavík, hæfileikarík,
ekkert landsbyggðar frík.
Ég veit ég vinn fokkings úrslitin,
öll hin lögin hafa tapað.

Til hamingju Ísland, með að ég fæddist hér.
Ég Silvía Nótt og þið haldið með mér.
Eurovision nation fær sko flog er ég kem.
Ég er fædd til að vinn?idda, tremma í hel.

Töff, töff, töff

Mitt lag ógisslega töff,
ekkert næntís ógeð.
Það er töff ókei það er ekkert gay,
ég er komin hér to stay.

Hinar tíkurnar eru bólugrafnar,
en ég er hrein mey.
Þið elskið mig, þið dýrkið mig,
en samt eitthvað svo glatað.

Til hamingju Ísland, með að ég fæddist hér.
Ég Silvía Nótt og þið haldið með mér.
Júróvísjon neisjon fær sko flog er ég kem.
Ég er fædd til að vinn?idda, tremma í hel.

Til hamingju Ísland, með að ég fæddist hér.
Ég Silvía Nótt og þið haldið með mér.
Eurovision nation ég fer fyrir þig.
Rúst?issu dæmi, fæ tremmamörg stig.

Gallabuxur í ræktinni

2006-01-25T01:43:00.000+02:00

Gallbuxnakellan var aftur að æfa áðan!
Þetta hefur þá ekki verið nein tilviljun þarna í fyrradag.

Jæks, hvað þetta hlýtur að vera óþægilegt.

Sunnudagur til sælu.. eða kotasælu

2006-01-22T23:07:00.000+02:00

Langt um liðið... mér hefur loksins tekist að grafa mig út úr snjóhúsinu og afþýða internettenguna...

Ég fór í WC í gær sem er nú svosem ekki í frásögur færandi. Ég er nú ekki vön því að skrifa um annað fólk á netinu en nú má ég til.
Það byrjaði á því að ég fór að fylgjast með konunni við hliðina á mér. Hún var í eldri kanntinum í stuttbuxum og GRIND horuð þannig að skinnið á fótleggjunum dinglaðist utan á beinunum. Hún hjólaði eins og brjálæðingur á einum (1) og á meðan hún var að því las hún blað. Þegar blaðið var búið fletti hún til baka og fór að leysa krossgátu!

Á meðan ég var að hjóla kom kona, líka í eldri kanntinum inn. Skellti jakkanum sínum á ofninn og settist í næsta í tæki. Ekki í frásögur færandi nema hvað að hún var í gallabuxum og peysu. Fyrst datt mér í hug að hún færi bara í tæki fyrir efri partinn, ó nei.... hún tók nokkur fótatæki líka. ÓMG.... í níðþröngum gallabuxum. Hún var nú ekki lengi, svona 15 mín hámark. Tók svo jakkann sinn og fór.

Ég hélt að það væri ekki hægt að toppa þessar tvær... en þá fór ég að taka eftir 3 skvísum sem töluðu svo mikið og flissuðu á hlaupabrettinu (nb. voru að labba). Þær voru svo í einkaþjálfun hjá einum gæjanum þarna (ætla ekki að setja nafnið hér, en hann byrjar á A). Þær voru svo ýkt að taka á því að það fór ekki fram hjá neinum þarna inni. ÆL...
Þetta voru svona týpur sem vilja helst ekki svitna í fínu æfingagöllunum sínum en eru samt svo að taka á því.

Sá svo einn eða tvo karlmenn í bolum með áletruninni Jónsmessuhlaup 1998, eða var það Reykjavíkurmaraþonið 1988???

Já, það er gaman að æfa í World class.

Nýtt ár og ný markmið!

2006-01-08T12:30:00.000+02:00

Halló!

Á nýju ári er ekki úr vegi að líta um öxl og rifja upp hápunkta síðasta árs í lífinu.

* Fór á U2 tónleika í Köben. Ég á eftir að lifa á þessu alla æfi. Nú langar mig bara aftur.
* Fór líka á Duran Duran tónleika í Egilshöll. Frábærir "aftur til fortíðar" tónleikar.
* Hljóp 10km í Rvk maraþoninu. Hélt aldrei að ég ætti eftir að geta það. Nú er ég orðin æst í að gera þetta aftur. Markmiðið er að bæta tímann næsta sumar. Set markið á 55 mínútur.
* Þetta var gott ár fyrir fjölskylduna mína. Börnin mín og eiginmaðurinn alltaf jafn yndisleg.
* Enduðum árið með stæl og keyptum okkur draumahúsið.

Er alveg viss um að nýtt ár verði jafn skemmtilegt og viðburðaríkt og það síðasta.

Markmið fyrir árið 2006:
Fyrir utan allt þetta dæmigerða... eiga góðar stundir með fjölskyldunni , missa nokkur kíló og vera dugleg í ræktinni:
* Ætla að lesa meira.
* Ætla að horfa minna á sjónvarpið.
* Ætla að smitast af skósýki

Eru þetta ekki göfug markmið????

Tvöþúsundogsex

2005-12-31T18:04:00.000+02:00

Gleðilegt ár!!!
Takk fyrir það gamla :-)
Megi nýja árið færa ykkur gleði og hamingju.
Skrifa meira síðar.

Frostrósir

2005-12-12T00:00:00.000+02:00

Fór á meiriháttar tónleika í gærkvöldi; jólatónleika Frostrósa. Æðislegur söngur, falleg lög og ef maður kemst ekki í jólaskap eftir svona tónleika þá er viðkomandi algjört steinahjarta.
Bakaði piparkökur í dag með familíunni, keyptum jólatré í gær (höfum aldrei verið svona snemma í því) þannig að þetta er allt að koma hjá okkur. Reikna með því að skrautið komi upp úr kjallaranum næstu helgi.
Þetta verður frekar annasöm vika en ég stefni að því að skrifa jólakortin í vikunni.

Kv. Stekkjastaura (er það ekki kvenkyns útgáfan af Stekkjastaur?)

Orðaleikir

2005-12-07T11:53:00.000+02:00

Ég á á á Á.
Ég c q í á.

Þetta er í Skruddu I

Svona orðaleikir eru alltaf svo skemmtilegir :-)

Hrærivél

2005-12-04T00:25:00.000+02:00

Ég var svo upptekin af því að monta mig af snilligáfu minni í gátulausnum að ég gleymdi því sem ég ætlaði upphaflega að blogga.

Í dag varð ég loksins fullgild húsmóðir. Elsku besta mamma mín gaf mér Kitchen aid hrærivél. Hún fór með okkur systurnar í Byko að fjárfesta í gripunum. Við tókum extra rúnt í versluninni með vélarnar í körfunni ef ske kynni að við myndum hitta einhverja sem við þekkjum (til þess að sýna hvað við erum heppnar).

Vélin sómir sér vel í eldhúsinu og ég hlakka til að vígja hana.

Nú á ég Kithchen aid hrærivél og blandara, auðvitað í sama lit. Nú vantar mig bara brauðristina en hún kostar bara 19.000 kall staðgreitt. Nei, nei bara að grínast. 2000 króna brauðristin okkar er ennþá í lagi og ristar brauðið okkar alveg ágætlega. Ætli Kitchen aid brauðristin risti brauðið betur?

Kveðja, Húsmóðirin með stóru H-i.

Gátusnilli

2005-12-04T00:18:00.000+02:00

Ég er búin að gera merkilega uppgötvun: Ég er gátusjúk. Ég er sjúk í krossgátu Moggans á sunnudögum, mér finnst skemmtilegt að leysa sudoku og svo er ég búin að uppgötva eina nýja bókmenntagátu. Og viti menn..... ég er nýbúin að leysa eina :-)

Robbie..

2005-11-22T11:08:00.000+02:00

Reyndi í marga klukkutíma í gær að fá miða á Robbie Williams tónleika í Köben næsta sumar.
Hann verður með tvenna tónleika 6. og 7.júlí í Parken (been there).
Því miður hrundi miðasölukerfið og margir Danir hundfúlir. Ég fór í röð á netinu og eftir 5 klukkutíma datt mér í hug að kíkja á billetlugen og þá kom fram að það var uppselt. Ég skráði mig samt á biðlista en það er jafn líklegt að ég fái miða eins og að vinna í lottói.
Það var svo hrikalega gaman á U2 tónleikunum að nú langar mig aftur á svona stórtónleika. RW er örugglega sjúklegur á tónleikum. Las í Mogganum í morgun að það hefði selst upp á 3 tímum á tónleikana hans á næsta ári. Oh well. Kannski koma einhverjir frægir hingað. RW kemur pottþétt ekki því það fauk svo illilega í hann þegar kom hingað fyrir nokkrum árum að hann hefur eflaust ekki áhuga á að koma aftur.

Ég náði í miða á Frostrósir í Laugardalshöll 10.des.

Bæjó... tónleikasjúklingurinn :-)

Monti monti

2005-11-10T02:00:00.000+02:00

Ég er svo montin að ég varð að monta mig hér:
Ég er búin með Mogga gátuna (n.b. úr sunnudags blaðinu). Ég er búin að vera að leysa hana í meira en eitt ár. Ég hef oftast átt eftir svona 3-4 orð, en aldrei tekist að klára hana sjálf. Er ég nokkuð algjör Nörri???
Hér er eitt snilldarorð: "lið" sagði Filipseyingur í boðun. Svar: Herkvaðning... Oh, frábært.
Fyrir áhugasama er hér heimasíða krossgátunnar.

Vetrarfríið var yndislegt. Prógrammið mitt gekk alveg upp. Út að borða, leikfimi og dúllerí. Öll familían fór svo í sumarbústað fimmtud-sunnudags. Frábær afslöppun.

Dagurinn í dag var ferlegur í skólanum. Margir uppstökkir, pirraðir og ég veit ekki hvað. Sumir gengu svo langt að þeir fóru að tala um fjöldauppsagnir.
Ég sver að þetta minnti mig á nýju VÍS auglýsinguna þar sem allt fer úrskeiðis. Það hlýtur að vera von á lægð yfir landið. Vonandi verður morgundagurinn skárri.

Bæjó, kennslukonan

Jóla hvað...

2005-10-31T17:02:00.000+02:00

Halló!
Ég valdi enn eitt útlitið á síðuna mína. Mér fannst eitthvað svo erfitt að lesa þetta síðasta.

Er búin að komast að því að svefn er gríðalega mikilvægur fyrir heilsuna, útlitið og sálartetrið. Þurfti að vaka til 6 sunnudagsmorgun vegna veikinda B. (gubbupest). Svaf til 10.30 og var svo allan gærdaginn hálf skrítin. Sljó í augunum, með "þynnkumaga" og auðvitað þreytt. Ótrúlegt hvað ein svona nótt hefur áhrif á mann. Væri nú ekki fínt að geta lagt inn í "svefnbanka" til þess að eiga innistæðu fyrir svona nætur?

Í dag eru samkvæmt nýjasta innliti mínu á jólasíðuna eru 54 dagar til jóla og ég er búin að afreka það að kaupa 4 jólagjafir!!!! Hugsa sér og það er bara október ennþá. Vonandi hef ég ekki falið þær svo vel inni í skáp að ég gleymi þeim þegar kemur að því að gefa þær.
Ég er búin að skoða jólaföndurblöðin mín nokkrum sinnum og get bara ekki ákveðið hvað ég á að ráðast í að gera þetta árið. Er búin að lofa mér í föndur með systur minni þannig að ég verð að fara að ákveða mig.

Ég tel núna klukkustundirnar niður í vetrafríið mitt....eða réttara sagt kennslustundirnar. Þær eru: 5 tímar á morgun og svo er einn fundur. Jibbííí. Miðvikudagurinn er þaulskipulagður. Leikfimi, lunch og búðarráp í búðir sem ég hef aldrei tíma til að kíkja í. Getur ekki annað en orðið góður dagur :-)

Konur... meira

2005-10-24T13:05:00.001+02:00

Fann þetta á netinu og ákvað að skella þessu inn:
Spurning hvort ég sé alveg glötuð ef ég fer ekki í bæinn.
Kannski ég skutli krökkunum í vinnuna til S og fari....er enn að bræða þettta með mér.

Vegna þess að:
...atvinnutekjur kvenna eru aðeins 64,15% af atvinnutekjum karla
...konur eru með 72% af launum karla fyrir jafnlangan vinnutíma
...barneignir hafa neikvæð áhrif á laun kvenna en jákvæð áhrif á laun karla
...margar konur búa við öryggisleysi og ógn á heimilum sínum
...ein af hverjum þremur konum verður fyrir kynbundnu ofbeldi á lífsleiðinni
...konur uppskera ekki í samræmi við menntun sína
...konur í fyrirtækjarekstri hafa verri aðgang að fjármagni
...ábyrgð á umönnun barna og heimilisstörfum er enn að mestu á höndum kvenna
...umönnunarstörf eru með lægst launuðu störfum á vinnumarkaði
...rödd kvenna er veik í fjölmiðlum
...litið er á líkama kvenna sem söluvöru
...kona hefur aldrei verið forsætisráðherra, bankastjóri eða biskup
...konur hafa aldrei verið helmingur þingmanna
...konur njóta ekki jafnréttis á við karla
...þessu þarf að breyta. Ég þori, get og vil!

Kvennafrídagur

2005-10-24T11:23:00.000+02:00

Fréttablaðið fær plús í dag, er með bleikan haus á blaðinu. Sýna konum samstöðu með þessu.
Þetta er í rauninni mjög merkilegur dagur. Hugsa sér að það væri hægt að draga fram skiltin sem notuð voru fyrir 30 árum og þau eiga enn við í dag. Þetta er ekki alveg nógu gott.
Er ekki alveg búin að gera það upp við mig hvort ég skundi niður í bæ þó svo mig langi. Ég mikla það eitthvað svo fyrir mér að dröslast með krakkana tvíbreiðri kerru og þurfa að leggja lengst í burtu. Strætóar henta mér ekki þegar ég er með þessa "huge" kerru.
Kannski ég drífi mig bara heim og verði með í anda.
Ég geng út kl.14.08 eins og aðrar konur (og sæki börnin á leikskólann).

Ég var mjög mikill femínisti í morgun, sagði eiginmanninum í gærkvöldi að hann gæti vaknað sjálfur og gæti straujað skyrtuna sem hann ætlaði í sjálfur.
Hann vaknaði sjálfur við vekjaraklukkunni sinni og fór í óstraujaðri skyrtu á morgunverðarfund.Kannski er það akkúrat þessi eina skyrta sem er straujfrí, ég man það ekki.

Samræmdu prófin eru búin. Mikið er ég fegin.
Íslenskuprófið var ekki skemmtilegt. Hér er dæmi úr stafsetningunni:
(Feitletruð orð eru orð sem nem. áttu að setja inn í.)
Það getur verið sáluhjálparatriði fyrir Brynhildi að tefla reglulega.
Í dag standa leiðbeinendur ekki við töfluna og reyna að miðla öllum sömu vitneskunni.
Ekki er nefnilega víst að fram fari mikið nám þótt kennslan sé prýðileg.
Ætla ekki að segja hvað mér finnst um þessar tvær síðustu setningar. Er það vitleysa í mér að það er talað niður til kennara? E.t.v. er ég ennþá svo bitur eftir verkfallið í fyrra....

13 dagar í vetrarfrí

2005-10-19T19:43:00.000+02:00

Ég er þekkt fyrir að telja niður í hitt og þetta og mundi skyndilega að ég hef alveg gleymt að telja niður i laaaaangþráð vetrarfrí. Nýjasta talning: 13 dagar :-) Það verður ljúft að komast í smá frí.

Óvissuferðin var mjög skemmtileg. Eftir viðkomu í mjólkurbúðinni og sjoppu lá leiðin austur á Nesjavelli (er það ekki annars austur???).
Þó að ég hafi unnið 3 sumur við skógrækt á Nesjavöllum hef ég aldrei gerst svo fræg að fara inn í virkjunina. Þar fengum við örstutta kynningu og svo glæsilegar veitingar.
Síðan var farið út í sérstaklega gáfulega leiki... t.d. láta blöðru ganga, semja ljóð og eitthvað fleira.
Mitt lið stóð sig á heildina litið mjög vel, en vegna hliðarvinds gekk blöðruleikurinn ekki alveg nógu vel.
Næsta stopp var sumarbústaður í Grímsnesi og þangað kom Grillvagninn. Það var ferlega gaman í bústaðnum og fínn matur. Var svo komin heim um miðnætti.

Á morgun verða samræmduprófin í 7.bekk. Ég á ekki von á öðru en að mitt lið standi sig vel. Fyrir áhugasama er hægt að kíkja á prófin hér.

Ofvirk og óvissa

2005-10-14T00:25:00.000+02:00

Ég held svei mér þá að ég sé ofvirk. Ég er að blogga í þriðja daginn í röð! Held að það hafi bara ekki gerst áður.

Afrekaði það áðan að horfa á hálftíma af íslenska Bachelornum. Ég veit satt best að segja ekki alveg hvað mér finnst um þennan þátt. Tók eftir að gæjinn var búinn læra stunurnar sem einn af alvöru Bachóunum var alltaf með (get ekki munað nafnið en það er þessi sem var á undan Andrew Firestone, ljóshærði gæinn...).
Stuna/Andvarp...... skipta um stellingu... segja nafnið.... viltu gera mér þann heiður að þiggja þessa rós. Hehe... bjánahrollur...
Ég myndi gefa mikið fyrir einn gamlan góðan Bachó klúbb aftur. Við vorum nefninlega nokkrar stelpur sem hittumst (þekktumst ekki allar) og horfðum á nokkrar Bachó seríur. Gúlluðum í okkur alls kyns veitingar og gláptum á þættina.
Get ímyndað mér umræðurnar sem yrðu eftir þennan íslenska.
Ætla ekki að missa af næsta þætti.

Á morgun er ég að fara í ferðalag. Veit ekki hvert. Veit bara að ég á að vera klædd til þess að vera úti, en samt ekki í gönguskóm.. humm....
Semsagt óvissuferð. Ég er alveg viss um að það verði gaman þó svo að mér finnist óþægilegt að vita ekki hvert ég er að fara. Þarf að vita það til þess að vita í hverju ég á að fara.

Adios

Bókatíðindi..

2005-10-11T22:41:00.000+02:00

Var að uppgötva mér til mikillar gleði og ánægju að skemmtilegasti tími ársins er að renna upp.
Nýjar bækur eru að koma út. Ég bíð spennt eftir bókatíðindunum, ritdómum ofl. Reyndar hef ég ekki verið eins afkastamikil í bókalestrinum síðustu ár en ég er samt alltaf að lesa eitthvað.
Ég er svo skipulögð að ég skrifa alltaf niður eftir jólin (áður en ég hendi bókatíðindunum) bækur sem mig langar að lesa.

Kveðja, Þe búkwörm

Mánudagur

2005-10-10T10:59:00.000+02:00

Jamm, mánudagur enn og aftur. Vegna takmarkaðs svefns aðfaranótt sunnudagsins vantaði mig svo sem eins og 2 tíma í morgun þegar ég vaknaði.
Við hjónin vorum á glæsilegri árshátið VISA sem haldin var á Hótel Selfoss. Frábært að gista á hóteli en eini mínusinn var að þurfa að rífa sig á lappir til þess að missa ekki af morgunmatnum. Ég tímdi alls ekki að
sleppa honum. EN... þetta var góð tilbreyting að gista "úti á landi" og skemmtileg árshátið :-) Þar var eitt fyndnasta skemmtiatriði sem ég hef orðið vitni að. Af því að ég hef svo rosalega marga lesendur að blogginu ætla ég ekki að kjafta því til þess að eyðileggja ekki fyrir öðrum sem e.t.v. lenda í því sama seinna.

Nýr mánuður...

2005-10-02T22:49:00.000+02:00

Gott að það er komin ný vika.
Síðasta var frekar erfið eftir heimsókn lækjarkötu. Þetta orð lærði ég í síðustu sunnudagskrossgátu. Fyrir þá sem hafa ekki hugmynd er þetta annað orð yfir niðurgang (smekklegt). Fékk reyndar annað í kaupbæti sem kallast uppköst. Ég held að ég hafi ekki orðið svona lasin lengi. Ég ætla ekkert að lýsa þessu í smáatriðum.
Ég mætti þó í vinnuna á þriðjudaginn 2 kílóum léttari, en ég er nú búin að innheimta þau léttilega aftur.

Skrapp aðeins í Smáralindina í dag til þess að gera svakalega góð kaup á Kauphlaupinu, eða þannig. Fékk vægt sjokk yfir verðinu á barnafötum. Ég sem er svo vön að kaupa í útlöndum (nú hljómar þetta eins og ég sé alltaf í verslunarferðum) eða fæ úr H&M þegar mamma fer út.
Það er bara ekki möguleiki að ég kaupi eitt stykki barnapeysu á 4400 kall.
Á morgun þarf ég að kaupa nokkrar sokkabuxur á B, vonandi eru þær ekki allt of dýrar.

Jæja, ég verð að þjóta. Sunnudagskrossgátan bíður og það er fundur í krossgátuklúbbnum á morgun. Verð að vera búin með aðeins meira.

Nýtt look

2005-09-21T23:28:00.000+02:00

Halló!
Það var nú ekki mikið mál að breyta útlitinu á síðunni. Takk Essý! Ég ætla að hafa þetta dökka útlit núna í tilefni þess að það er farið að dimma úti og kólna.
Svo er ég algjör fegurðardís... NOT... ég er komin með svo ógeðslega frunsu að það hálfa væri meira en nóg. Ég get bara ekki munað eftir því að hafa fengið svona ófögnuð áður. Ég var svo græn að ég hélt að þetta væri bara svona ófrýnileg bóla. Ó nei.. ekki bólufés heldur frunsufeis. Jæks... Ég veit ekki hve margir spurðu mig í dag hvort ég væri með frunsu. Nei, ég var að fá mér Botox. Hvurslags spurning er þetta?

Ég fer í fyrramálið í morgunmat í boði Íslandsbanka, sérstaklega fyrir hlaupahópinn. Ég gerðist svo djörf að ég fékk frí í vinnunni til að fara. Get ekki misst af því að fá góð ráð fyrir framhaldið. Ég er búin að vera nokkuð dugleg að fara að hlaupa, enda tími ég ekki að missa þetta niður. Nú þarf ég bara að fara að setja mér ný markmið.

Kveðja, The new me

Nöfn

2005-09-19T12:52:00.000+02:00

Hvað segið þið um þessi nöfn:
Ævar Eiður
Línus Gauti
Mist Eik????

Þetta var í einu atriði í Stelpunum, alveg meiriháttar fyndnir þættir.

Svo benti einn nemandi minn á: Ísak Skúli (prófið að segja þetta hratt)....
Ég er eitthvað klikk, ég get endalaust flissað þegar ég segi þessi nöfn.

Ég er búin að fá leiðbeiningar um hvernig ég á að breyta bakgrunninum. Geri það við fyrsta tækifæri.

Helgi

2005-09-09T18:57:00.000+02:00

Ég mun seint teljast til æstra bloggara, en ég blogga þó öðru hvoru.
Ég er að reyna að finna út úr því hvernig ég breyti um bakgrunn (komin með ógeð á þessum sápukúlum). Ef ég finn ekki út úr þessi skipti ég yfir í fólk.is/gurdan.... Can someone please help me???

Enn og aftur er komin helgi :-) Ýmislegt skemmtilegt er á dagskrá. Þ.á.m fyrsti tími í íþróttaskólanum hjá EogB. Það verður örugglega og ég á von á því að þau geti þá fengið smá útrás fyrir hreyfiþörfina. Svo er fjölskyldukaffi hjá litlu systur á sunnudaginn. Semsagt familíuhelgi sem er BARA gott.

Diesel gallabuxur

2005-08-28T22:43:00.000+02:00

Helló!
Skrapp í Kringluna í gær eftir að ég frétti að það væri hægt að kaupa Diesel gallabuxur á afborgunum. Var að spá í að skella mér á eitt par. (je ræt).
Ég kíkti frekar í Next þar sem hægt er að kaupa ca 5 gallabuxur fyrir eitt stykki Díesel skvísel grallarabrækur.
Það er svo sem ekki í frásögur færandi nema hvað að ég heyri tvær afgreiðsludömur ræða eitthvað sem ég er ekkert sérstaklega að hlusta á. Þá segir önnur: Ég er svona 4-5 kg þyngri en ég á að vera! Hver segir hvað maður Á að vera???? BTW þessi stelpa var svo grönn að hún var með innfallinn maga og var svona helmingurinn af mér á hlið.... Fannst þetta bara doldið dapurt.

Ég er óðum að komast niður á jörðina eftir stórkostlega íþróttaafrekið mitt. Ég fór meira að segja að hlaupa á föstudaginn 6 km hring. Ég var mjöööög létt á fæti.
Ég hef aðeins verið að hvíla mig því skórnir mínir eru búnir á því og tærnar mínar þurfa smá pásu.
Ég er á leiðinni að fara að velja mér nýja skó.

Stór dagur :-)

2005-08-21T19:48:00.000+02:00

Í gær var svo sannarlega merkilegur dagur á íþróttaferlinum. Ég hljóp 10km í Reykjavíkurmaraþoninu!!! Náði því á tíma sem ég bjóst við. Einum klukkutíma og 1 mínútu. Á að vísu eftir að sjá tímann á www.marathon.is, en þetta er tíminn sem ég mældi.

Ég er svo ánægð með sjálfa mig að það nær engri átt (hættu að lesa hér ef þú vilt ekki heyra meira grobb). Ég kom hlaupandi í mark með bros á vör með ofurskammta af adrenalíni í æðunum. Þetta var alveg frábært :-)
Ótrúlega gaman að sjá árangur erfiðisins.
Nú er ég alveg harðákveðin í að halda áfram hlaupunum. Hef hugsað mér að hlaupa 2x í viku í vetur og æfa svo í WC líka.
Þar sem ég á afmæli á næstunni er búið að lofa mér nýjum hlaupaskóm í afmælisgjöf. Skórnir mínir (15.000 krónar Asics skór) eru barasta búnir. Ég á hlaupabuxur, nú vantar mig bara hlaupajakka.

Hlaupakveðja

Allt tilbúið

2005-08-19T23:05:00.000+02:00

Allt er að verða tilbúið fyrir morgundaginn.

Búin að þvo hlaupagallann,
búin að fara í pastaveisluna
búin að sækja keppnisgögnin
búin að biðja guð um meðvind
búin að setja úrval af bestu hlaupalögunum á mp3 spilarann
búin að borða orkusúkkulaði sem heitir því skemmtilega nafni Snickers marathon.. það hlýtur að gefa mér mikla orku því annars hefði ekki verið að gefa það í pastaveislunni
búin að hlaupa leiðina í huganum
búin að keyra leiðina

Nú á ég bara eftir að hlaupa.

Blákaldar staðreyndir....

2005-08-14T22:27:00.000+02:00

1. Sumarfríið mitt er búið.
2. Þetta er búið að vera fínt frí.
3. Eftir 5 daga ætla ég að hlaupa 10km.
4. Ég er sannfærð um að ég geti það.
5. Ég er búin að fara í 3x í bíó á 10 dögum.
6. Það eru fleiri skipti en á síðasta ári (þar af Madagaskar 2x).
7. Ég á bráðum afmæli....
8. Sigli hægt og örugglega inn í fertugsaldurinn.
9. Farin að laga til í pennaveskinu mínu.

Búin að fá málið aftur

2005-08-09T00:05:00.000+02:00

Jæja, ég er búin að fá málið aftur eftir U2 tónleikana og Köbenferðina.
Ekki misskilja mig, ég missti ekki röddina heldur var ég svo uppnumin eftir þessa upplifun að ég gat ekki komið upp einu orði. Núna er vika síðan og ég er að komast niður á jörðina aftur.
Hér er tónleikasagan:
Við ákváðum að mæta tímanlega þar sem við höfum ekki mikla reynslu af tónleikum af þessari stæðrargráðu. Vorum komum fyrir utan Parken um 6.30. Fengum okkur pylsu, ég keypti bol. Á þessari stundu komu 3 regndropar úr loftinu. Við ákváðum að fara inn. Þetta tók allt saman dágóðan tíma.. klósettferð ofl. Anyway... við ákváðum þá að fara út og athuga stöðuna og sjá hve margir voru komnir á "plænen". Um leið og við stígum út kemur þessi úrhellisrigning! Fokið var í flest skjól (ekki mikið í boði). Við hjónin ákveðum að fórna okkur og hlupum til þess að reyna að fjárfesta í regnplasti. Við hlupum út um allt og alltaf urðum við blautari og blautari. Ég man eftir því að ég hugsaði: Æ, þetta verður ömurlegt. Á einhvern undraverðan hátt kem ég auga á einn sölumann regnplasts. Þau kostuðu morðfjár: 50 kall danskar. Hugsa að ég hefði keypt það á 100 kall. Í stuttu máli þá bjargaði þetta plast okkur gjörsamlega. Gátum hlýjað okkur í því. Það stytti upp en svo fór að hellirigna aftur þegar tónleikarnir voru hálfnaðir. Ég held að ég hafi aldrei í lífi mínu orðið svona blaut. En þetta urðu bara eftirminnilegri tónleikar fyrir vikið. Ég man ég stóð og klappaði og horfði á rigninguna renna niður eftir handleggjunum mínum og hugsaði: Guð, þetta er eins og að vera í baði. Ætli úrið mitt sé vatnshelt.

Við tókum okkur stöðu fyrir framan miðju þegar 2 tímar voru í tónleikana og ég held að það hafi bara verið góð hugmynd því þetta var bara fínn staður.
Þegar tónleikarnir byrjuðu fékk ég nettan ánægjuhroll. Uno... doz.....tres.... Úff, ég fæ gæsahúð bara að skrifa þetta.
Þetta var svo flott show! Lögin æði... ég söng með næstum öllum lögunum... geðveik stemning....

Eftirminnilegustu lögin voru: One, somethimes you cant make it on your own, elevation, where the streets have no name, pride (in the name of love), ofl.ofl.

Niðurstaða: Þessir tónleikar fara á topp 10 listann minn yfir frábærustu upplifanir lífs míns! í sama flokki eru: Fæðing barna minna, brúðkaupið mitt og fleira í þessum dúr.
Nú langar mig bara að fara aftur á U2 tónleika :-)

Amen...

U2

2005-08-02T16:33:00.000+02:00

Ég er komin heim, búin að fara á tónleikana.
Skrifa meira síðar, en eitt get ég sagt: Það var ólýsanlega meiriháttar!!!!!!!

Adios,

Hvar er sumarið???

2005-07-10T00:32:00.000+02:00

Ég er með hugmynd að breyttum texta við þekkt Sálarlag: Hvar er sumarið? Hvar ertu sólin mín og hiti.. o,ó sumarið???
Ég get svarið að ég man ekki lengur hvenær voru sól og sumardagar. Man í fjótu bragði eftir 17.júní. Veðurspá vikunnar vekur ekki hjá manni vonir um betri tíma.... ó nei, bara rigning. Jæja, ég er hætt þessari svartsýni, sumarið er rétt að byrja og nú fer að styttast í sumarfrí fjölskyldunnar.

Ég er búin að vera mjög dugleg í hlaupunum svo ég monti mig nú aðeins. Ég er svo stolt af sjálfri mér fyrir að geta þetta. Það er líka svo gaman þegar maður finnur mun. ´
Nú er hlaupajakki efstur á óskalistanum. Helst með litlum vasa fyrir bíllykilinn/húslykilinn. Það er meiriháttar vesen að koma bíllyklinum fyrir þegar enginn er vasinn á fötunum (giskið þið nú).

Bæjó spæjó..

Duran, wic wam og ....

2005-07-04T16:00:00.000+02:00

Ég er búin að ná mér eftir Duran Duran tónleikana. Vá hvað var gaman!!!! Ég hef alltaf átt í erfiðleikum með að skilja orðið Nostalgía, en nú hefur það orð algjörlega náð að festa sig í hausnum mínum. Ef þessir tónleikar voru ekki frábært dæmi um nostalgíu þá veit ég ekki hvað.
(Nostalgía: Ljúfsár söknuður eftir liðnum tíma).
Þegar gömlu goðin stigu á svið fékk ég gæsahúð! ÓMG..... hvað ég er búin að þrá að heyra röddina í Simon le Bon í mörg ár!!! Hehe... ok.. er að ýkja smá.
Þetta var semsagt meiriháttar gaman og þeir tóku öll gömlu góðu lögin. Ég hefði samt alveg verið til í að komast aðeins nær sviðinu, en ég var bara í B-svæði.

Á laugardaginn fór svo familían í Smáralindina að sjá norsku rokkarana í Wic wam... þeir voru líka æðislegir. Svipurinn á krökkunum var líka óborganlegur. Þau kunna nefninlega Eurovision lagið þeirra. Við ölum börnin okkar í upp því að hlusta á fjölbreytta tónlist. Allt frá trompetleik til rokktónlistar.

Samkvæmt nýjustu talningu verð ég á U2 tónleikum eftir nákvæmlega 27 daga. Ég fer semsé á tónleikana í þessum mánuði :-)

Tónlistarkveðjur...

Le Bon, Duran Duran....John Taylor.... ofl.

2005-06-29T23:02:00.000+02:00

Ég fékk nettan bjánahroll í dag þegar ég hlustaði á beina útsendingu þegar Duran Duran mættu á klakann. Ef einhver hefði sagt mér fyrir 20 árum að ég ætti eftir að fara á tónleika með DD hefði ég gjörsamlega misst mig. Þetta er svo fáránlegt eitthvað. Fara og hlusta á eldgömlu átrúnaðargoðin spila lög sem ég og Maja vinkona sungum í míkrófón sem pabbi hennar átti fyrir löööööngu síðan. Ég ætlaði að giftast John Taylor... bara formsatriði að ná í hann. Maja átti bútaplakatið úr Bravó blöðunum, ógeðslega flott. Í réttri stærð. Spáið í því!!!!
Verð að viðurkenna að ég hlakka bara til.

Wild boys.... save a prayer.... ordinary world.... hungry like a wolf.... my name is Rio....

Júbííííí......

P.S. Hvernig ætli U2 innleggið mitt verði???? Verð að fara að skrifa uppkastið því nú fer að styttast í aðaltónleikana :-)

Önnur vika..

2005-06-24T18:18:00.000+02:00

í sumarfríinu er að klárast. Ég get svarið það hvað tíminn líður hratt. Ég er nú búin að hafa nóg fyrir stafni: T.d. fara 3x út að borða í hádeginu, fara í WC, útrétta fult, slappa af. Ég er ekki einu sinni búin að hafa tíma til að taka skápana í gegn eins og ég geri venjulega í upphafi sumars. Kemst ekki í það á mánudaginn því þá fer ég til tannsa. Semsagt nóg að gera :-)

Við skötuhjúin fórum í Jónsmessuhlaupið í gærkvöldi. Fórum heila 3 km, en ég sá svo eftir því að hafa ekki farið 5 því ég hefði sko alveg getað það. En það var bara gaman að vera með. Vorum svo fljót að við vorum fyrst í heita pottinn eftir hlaupið.
Annars varðandi afrek mín á hlaupanámskeiðinu eru alveg þokkaleg. Ég geri það sem mér er sagt að gera og lifi það alveg af (get hlaupið 5km án þess að deyja). Markmiðið mitt er ennþá að hlaupa 10km á innan við klukkutíma. Það eru ennþá 2 mánuðir til stefnu þannig að ég hef nægan tíma til bæta mig!

Letikveðjur....

Laugardagur

2005-06-18T12:21:00.000+02:00

Hæ hó jibbí jei... í gær var 17.júní. Ég man bara ekki eftir öðru eins veðri, hægt að vera á stuttermabol og það var heitt! Ég man frekar eftir öllum skiptunum þegar við krakkarnir vorum klædd í sokkabuxur og þykkar peysur undir sumarjakkana. Við erum svo glötuð að við nenntum ekki í neinn troðning þannig að við löbbuðum Laugaveginn, sáum fornbílana keyra niður, sáum Kalla á þakinu á Arnarhóli og fórum svo i kaffi til langömmu. Krakkarnir voru alsæl. (sem er auðvitað aðalatriðið).

Ég var ein heima í gærkvöldi sem var kannski bara eins gott því ég horfði á svo frábæra mynd: The notebook. Ég hef lesið bókina 2x en þrátt fyrir það grét ég úr mér augun yfir myndinni. Hún er svo falleg. *Grát* Mæli með henni.

Ups.. I did again

2005-06-16T14:46:00.000+02:00

Ég trúi því varla hvað ég er heppin :-) Það liggur við að ég þurfi reglulega að klípa mig í handlegginn til þess að athuga hvort þetta sé draumur. Ég er komin í sumarfrííííííí!!!
Nú verð ég eins og fín frú að dúlla mér næstu vikurnar ein, því krakkarnir verða áfram á leikskólanum þangað til við förum saman í frí fjölskyldan. Ég kannski sæki þau snemma einhverja daga en annars ætla ég bara að halda rútínunni.

Ég mætti aftur í hlaupahópinn. Mér gekk mun betur að hlaupa síðast. Svo fór ég að hlaupa í morgun því ég kemst ekki í kvöld. Ekkert mál. Kannski ég geti æft mig nóg svo ég geti hlaupið 10km. Það er allaveganna markmiðið. Ég er í svaka æfingagír núna. Go go go...

Gat það

2005-06-10T02:23:00.000+02:00

Mér tókst þetta :-)
Hljóp 5 km og var ekki síðust.. hehe... Ég fór í miðhópinn því ég tel mig í þokkalegu formi, er að æfa en hef kannski ekki hlaupið svo mikið úti.
Anyway... þetta var helv.. erfitt en sem betur fer lá leiðin niður á við síðasta spölinn. Ég var ferlega stolt af sjálfri mér að hafa gert þetta. Hugsa að ég mæti aftur á þriðjudaginn og býst meira að segja við því að ég fari eftir hlaupaáætluninni sem kemur í pósti til mín á morgun.
Góða nótt,

Sjúddírarírei

2005-06-09T18:10:00.000+02:00

I'm so glad..... Nú á ég ekki svo mikið eftir. Morgundagurinn verður tekinn í tiltekt í skólanum. Tek Bólu-Hjálmar hjálparhelluna með mér. Vonandi næ ég að klára allt á morgun.

Ég er búin að gera það ótrúlega: Búin að skrá mig í hlaupahóp sem æfir fyrir 10 km hlaup í Reykjavíkurmaraþoninum. Mæting 2x í viku og svo þarf auðvitað aðeins að mæta fyrir utan það. Vonandi get ég þetta :-/ Fyrsti tíminn minn er á eftir. Ef ég skrifa ekki á morgun hef ég ofreynt mig í Laugardalnum.

Kveðja, Hlaupakellan

Það er að koma sumarfrí

2005-06-05T13:26:00.000+02:00

Ég hélt svei mér þá að sumarfríið hefði hætt við að koma. Eftir gríðalega törn í vinnunni er ég farin að sjá fyrir endann á þessu. Bara næsta vika eftir og þá ætti ég að vera komin í frí :-)
Að vísu er B kominn með hlaupabólu þannig að hún gæti aðeins seinað fríinu en það er nú allt í lagi. Síðustu dagana er bara tiltekt og þh.
Meira síðar.

Aftur nýtt met

2005-05-22T22:48:00.000+02:00

Jæja.... þetta fer að verða eins og ótrúleg lygasaga.
Ég kláraði 3. ofurpencilín skammt á fimmtudaginn og það er eins og ég bjóst við, var farin að finna fyrir mjög svo kunnuglegum einkennum í gær. Þetta er nú hætt að verða fyndið. FJÓRÐA helv.... hálsbólgan í röð!!!! Ég nenni þessi ekki. Ég er nú ekkert sérlega veik með þessu en er kannski ekki alveg í toppformi.
Ég fór til HNE læknis í vikunni og ég er komin á "takahálskirtillista" vei.... Það á að skera hann úr og brenna fyrir með leiser. Get þá sagt að ég sé að fara í leiseraðgerð. Doldið svalt.
Haldiði svo ekki að ungfrú bóla sem hleypur sé mætt á svæðið!!!! Það kom að því. Þetta er búið að vera að ganga í leikskólanum svo við erum búin að vera að fylgjast með krökkunum. Í dag fór ekkert á milli mála að E væri komin með hana. Það var akkúrat 5 mín áður en við ætluðum að leggja af stað í skírnarveislu. Uppgötvaði 2 bak við eyrað þegar ég var að greiða henni. Hún fékk samt að fara með í kirkjuna og var svo skutlað til ömmu. Við höldum að B sé líka að fá þetta því hann er örugglega kominn með 2 stk í andlitið. Það kemur þá pottþétt í ljós á morgun.

Ég ætlaði að hafa þetta svaka Júróvisjón innlegg. Þetta var nú meiri trommukeppnin. Við héldum með norska laginu og svo var það danska auðvitað meiriháttar líka :-)

Fimmtudagskvöldið 30.júní 2005 verð ég stödd í Egilshöllinni að syngja með Duran Duran (Essý nú geturðu líklega giskað á hver afmælisgjöfin þín verður).
Þetta verður fín upphitun fyrir U2 tónleikana (fyrir þá sem ekki vita þá er ég semsagt að fara á U2 líka í sumar).

Hálsbólgu og Hlaupabólukveðjur,

Nýtt met

2005-05-11T22:05:00.000+02:00

Ég held svei mér að ég sé að slá nýtt met. Hálsbólga #3 er mætt á svæðið. Get svo svarið það. Ég kláraði lyfjaskammtinn minn á föstudaginn og fann fyrir einkennunum á sunnudag. 3 ofurpencilín skammturinn kominn í lyfjaskápinn. Nú er ég búin að panta tíma hjá sérfræðingi í næstu viku. Ætli það þurfi ekki að rífa þennan þrjóska hálskirtil úr mér. Hugsið ykkur.. búið að skera hann einu sinni í burtu og hefur svo tekið sér 14 ár í að vaxa aftur. Veiiii eða þannig sko. Fór nefninlega í hálskirtlatöku fyrir 15 árum (finnst samt eins og það hafi verið í gær) og það er ekki skemmtileg aðgerð, en ég læt mig hafa það.

Við hjónakornin fórum á djammið á laugardagskvöldið. Fengum næturpössun (takk elsku besta systir mín), fórum út að borða, bjórkvöld og svo síðast en ekki síst: Ball með Sálinni. www.salin.is
Það er búinn að vera draumurinn í mörg ár að komast á Sálarball. Það var alveg ferlega gaman. Verst hvað var troðið. Kom heim með marblett á augabrúninni, á hægri ristinni og nokkur sár á fótunum. Slapp alveg við brunagöt.
Fyndið hvað fólki finnst það merkilegt að við förum tvö saman út að skemmta okkur. Við hljómum eins og risaeðlur. Útdauðar lífverur. Mæli með þessu.

P.S. Elska þessa setningu: Þú fullkomnar mig....... Elska samt meira þessa setningu með U2: Sometimes you can't make it on our own..... Varð að koma því að U2 er auðvitað í fyrsta sæti þó svo að ég hafi farið á Sálarball.
Samkvæmt talningu systur minnar eru ekki nema 81 dagur í tónleikana.

Gleymdi einu:

2005-05-03T00:51:00.000+02:00

Steingleymdi aðal montinu: Ég er búin með sunnudagsmorgunblaðskrossgátuna í fyrsta skipti.
Hef oft átt nokkur orð eftir en nú er ég búin. ÓMG hvað ég er montin. Síðasta orðið sem ég gat var: Grunnur fjörður þar er ætið er alvarleg kreppa. Svar: Krísuvík of course.

Enn meiri mont kveðjur,

Rídalín

2005-05-03T00:45:00.000+02:00

Ég er búin að vera svo ferlega dugleg í dag að það mætti halda að ég hefði komist í rídalín töflur.. hehe aðþrengdar eiginkonur brandari. Ég fór yfir heilt fjall af bókum í dag, fór á einn fund, gerði 2 einstaklingsáætlanir, undirbjó morgundaginn og ýmislegt fleira. Já, og pantaði vorferð fyrir árganginn.
Nú er klukkan 22.48 og ég hef 12 mín áður en ég ætla að vera komin í bólið. Stefni á WC í fyrramálið.

Monti monti.
Adios, ofur eiginkonan...

P.S.

Sjúddírarírei

2005-04-30T01:21:00.000+02:00

Jess, komin helgi :-) Ég fór áðan á alveg æðislega burtfaratónleika hjá fyrrverandi samstarfskennara mínu. Hún kom svo sannarlega á óvart! Ég var alveg viss um að ég myndi ekki fíla svona "sópran" söng en þetta var svo flott hjá henni. kannski þetta eru "elli"merki að vera farin að njóta þess að hlusta á svona söng. Veit ekki....
Ég fann það hvað var gott að skreppa út á föstudagskvöldi. Hefur hressandi áhrif og þ.a.l er ég ekki sofnuð í sófanum.

Nú er ég komin með nýja handáburðinn minn og hanskana. www.thesanctuary.co.uk. Þetta er langbesti áburðir sem ég hef prófað og ég hef sko prófað þá nokkra. Þetta er þannig að maður smyr ríflega af áburði á hendurnar og skellir svo á sig svona hvítum Michael Jackson hönskum. Annað hvort í klukkutíma eða sem er best að sofa með þá. Eiginmaðurinn er ekki spenntur þegar ég mæti með þetta í bólið. hehe....
En það sem skiptir mestu máli: Hendurnar eru silkimjúkar á eftir.

Jæja, ætla að horfa á einn Law and order með hanskana á mér.

Bæjó spæjó

Sumarið er komið...

2005-04-26T23:26:00.000+02:00

Já, það var svo sannarlega vor í lofti í dag :-) Ég var einmitt í Húsdýragarðinum í dag með nemendum mínum. Sá mig enginn í sjónvarpinu??? Ég var rosalega lekker í viking stígvélunum.... tölum ekki meira um það.

Nýjasta nýtt er að ég er enn og aftur komin með streptókokka. Frábært-NOT... Ég sem er nýbúin með pencilín skammtinn minn. Ég vona bara ekki að ég hafi smitað alla sem ég er búin að vera í samandi við síðustu 3 daga. Lauslega talið eru þetta 130 manns. ÚPS...
Ég hugsa að ég neyðist til að vera heima á morgun. Það hentar mér engan veginn en hvenær má maður svosem vera að því að vera lasin?

Vonandi verða engar veikindafréttir í næstu færslu.

Að hressast

2005-04-14T12:10:00.000+02:00

3 stk pencilín skammtar til á þessu heimili, fyrir alla nema eiginmanninn.
Á þriðjudaginn var hringt af leikskólanum og B orðinn veikur. Við fórum saman á heilsugæsluna og fengum meðal. Skarlatssótt hjá honum og streptókokkar hjá mér.
Sem betur fer eru allir á batavegi og geri ráð fyrir að mæta í vinnuna á morgun. Þægilegt að mæta einn dag og fá svo helgi... hehe, kenna svo 3 daga, frí einn dag og svo helgi aftur.

Annars er ekkert að frétta....

Veikindi...

2005-04-12T13:56:00.000+02:00

Það kom að því. Hálsbólga mætt í minn háls, ég sem verð ALDREI veik. Mér finnst alltaf jafn furðulegt að fá hálsbólgu í restarnar af öðrum hálskirtlinum. Glatað. Það er víst ekkert óalgengt að þetta ógeð geti vaxið aftur eftir að þeir eru teknir.
Ég er sem betur fer ekki illa haldin, er á fótum.
Við mæðgurnar erum heima því hún er að jafna sig eftir hræðilega pest;skarlatssótt. Ég held ég hafi aldrei séð hana eins veika og hún var á laugardaginn. Hún er komin á pencilín og er á batavegi.
Ótrúlegt hvað mér finnst ég ómissandi í vinnunni. Hugsaði í morgun þegar ég vaknaði, æ ég mæti bara og fer heim ef ég verð eitthvað slöpp. Það fer allt í rugl þegar kennarinn mætir ekki. Einhver að kenna eitthvað. Svo ákvað ég að hugsa fyrst og fremst um sjálfa mig hringdi mig inn veika. Það er ekki eins og ég þurfi að vera með móral. Mig er ekki búið að vanta mikið í vetur. Ekki eins og við er að búast af móður með 2 leikskólabörn.

Kveðja, "sjúklingurinn"

Ekkert

2005-04-01T11:35:00.000+02:00

Veit ekki alveg hvers vegna það kom svona svakalegt bil á undan síðustu færslu. Vonandi gerist það ekki núna.
Frábær föstudagur í dag. Langþráð helgi að byrja. Mér finnst alltaf smá erfitt að byrja að vinna aftur eftir gott frí. Þetta er annars búin að vera ágæt vika bæði vinnulega og leikfimislega séð. Ætla að skreppa í WC seinni partinn í dag og láta betri helminginn elda á meðan. Lúxuslíf????? Að vísu versla ég inn í matinn.

Ef þið kíkið á síðuna hjá systur minni getið þið fylgst með hvað er langt í U2 tónleikana, ég kann nefninlega ekki að setja inn svona teljara.
Góða helgi :-)

London London.. Páskar

2005-03-26T19:29:00.000+02:00

Mikið svakalega er páskafrí góð uppfinning. Ef þetta er ekki besta fríið þá veit ég ekki hvað. Allir í rólegheitunum að dúlla sér með fjölskyldunni - kvalití tími.
Húsmóðirin er komin heim aftur frá London. Í stuttu máli sagt: Það var BARA gaman :-) Við vinkonurnar höfðum það æðislega fínt. Versluðum "aðeins" (smá afsökun... ég var að kaupa á 4 og meira að segja smá til heimiilins. Mæli eindregið með www.bluewater.co.uk.
Fórum túristarúnt í downtown London, út að borða á pöbb,ítalskan, indverskan og mexikanskan veitingastað. Ekki má gleyma skólaheimsókninni. Það var mjög athyglisvert og við vorum sammála um að það vantar aga í íslenska skóla. Bresku krakkarnir voru svo stillt og prúð að við fengum smá sjokk.

Lærði nýtt orð í dag: Bjánahroll (sjá dálkinn aftan á Fréttablaðinu í dag). "Bjánahrollur er þegar ákveðin lúmsk,klígjuleg tilfinning - alls ekki óþægileg - hríslast niðuir bakið, eftir mænunni, í kjölfar þess að maður verður vitni að einhverju bjánalegu. .... Umræddur viðburður eða háttalag þarf að vera einhvern veginn allt í senn hallærislegur, púkalegur og bjánalegur og þarf að vera til vitnis um það að eitthvað hafi átt sér stað sem er einhvern veginn plebbalega út úr takti við allt annað og svo klúðurslega yfir strikið og neyðarlegt að maður fær semsagt líkamleg áhrif, sem lýsa sér í umræddum hrolli eða kipp".

Ég held að ég hefi fengið mesta bjánahroll ever þegar Fischer kom til landsins og útsýniningar Rúv og stöðvar 2 voru rofnar vegna þessa merkilega atburðar. Það mætti halda að það hefði hafist gos í Esjunni.

Gleðilega páska,

Skyr, jógúrt ofl.

2005-03-12T16:10:00.000+02:00

Jæja, ein í kotinu með börnunum. Bóndinn á tölvusýningu í Hannover. www.cebit.de
Það er nú ekki eins hrikalega erfitt að vera ein með börnin núna. Þetta er bara ekkert mál!
Svo fer nú að styttast í mitt "orlof". Bara 5 dagar þangað til! Jei....

Ég er búin að taka þátt í verðstríðinu mikla sem er búið að standa síðustu viku. Fór í Bónus á fimmtudaginn, keypti helling af skyri, skyr.is, cereousi, jógúrti, vínberjum ofl. Fyllti 3 poka fyrir utan morgunkornið. Allt þetta kostaði 2500 kall! Svona á þetta að vera.
Ég horfði á sumar konur vera með heilu körfurnar af "verðstríðsvörum" og það lá við slagsmálum út af tveimur tveggja lítra kók flöskum. En það sem ég var að spá er hvaða pláss heufr venjulegt fólk (ja, eða venjulegir ísskápar) fyrir allt þetta? Þó þetta hafi verið næstum því gefins keypti ég bara það sem ég sé fram á að verði borðað, og n.b. það er pláss í ísskápnum mínum fyrir ýmislegt annað.

Adíos amígos....
Bónusgellan

Áfram

2005-03-05T11:46:00.000+02:00

Ég sé að það eru a.m.k tveir sem skoða bloggið mitt. Tveir sem þora að viðurkenna það. Ég held því ótrauð áfram.

Lenti í svaka púli á fimmtudaginn. Fékk það staðfest að ég er rosalega sterk með gott úthald. Bar 8 pakka af parketi, 1 flísapakka, 3 rúllur af undirlagi upp á 3. hæð. Hver parketpakki var 24 kg. Með í burðinum voru Eiginmaðurinn, mágurinn og systir. Ég gaf sko karlmönnunum ekkert eftir og var mjöööög ánægð með sjálfa mig á eftir. Fékk pínu strengi í handleggina og einn marblett á hægri mjöðm. Púlið í WC er greinilega að borga sig. N.B. var búin að taka þríhöfðann og brjóstvöðvana á miðvikudaginn. Monti monti monti.
Hringið bara í mig þegar ykkur vantar aðstoð við flutningar, biðjið mig fyrst!

12 dagar í London ferðina :-) Jibbíííí.

Blogg

2005-02-28T22:08:00.000+02:00

Ég hugsa að ég leggi bloggsíðuna á hilluna. Eftir að Stebbi litli bróðir minn (hann er reyndar bara 20 cm hærri en ég) fór að blogga hef ég fyllst þvílíkri minnimáttarkennd að ég hef barasta ekki getað skrifað neitt. Hann leynir svo sannarlega á sér drengurinn. Bullið sem vellur upp úr honum, vissi ekki að hann ætti þetta til.
Inga er líka að blogga og hún gerir það líka vel. Mjög miklar pælingar hjá henni í bland við minna gáfulegri hluti.
Svo kem ég elsta systirin, lífsreyndust og klárust.... með glataðasta bloggið. Hver ætli nenni að lesa um þreytta húsmóðir/kennslukonu sem kemur endurnærð úr andlitsbaði??? Ekki ég. Hver ætli nenni að lesa um húsmæðraorlof til London??? Ekki ég. Hver nennir að lesa nokkuð af því sem ég skrifa???? Ekki ég.

Ég legg ekki árar í bát, mótlætið herðir mig bara....

Adjö,

Dekurdagur

2005-02-12T02:26:00.000+02:00

Í dag átti ég frábæran dag. BTW (við veginn..hehe þessi er alltaf góður) var frí hjá mér í dag.
Byrjaði daginn á að fara í WC. Tók vel á þríhöfðanum því ég ætla EKKI að fá svona "flappsa". Fór í gufu á eftir. Ég man bara ekki hvenær ég fór síðast í gufu??? Jú, það var í gær því þá var ég líka í fríi.
Fór í Kringluna til þess að kaupa skírnargjöf, en keypti mér skó, pæjubol, sjampó fyrir ómögulegt hár(mitt hár) en enga gjöf!
Í hádeginu borðaði ég með Ingu www.blog.central.is/glora í Laugum.
Dreif mig svo á snyrtistofu í andlitsbað. Mikið svakalega er ég mjúk núna!!!
Sótti krakkana, fór í Smáralindina að skoða sjúkrabíl, þyrlu ofl. Mjöööög spennandi fyrir litla krakka.
Rétt náði að fara heim, skipta um föt og gera mig klára fyrir næstu dagskrárliði. Út að borða og í leikhús.
Já, svona eiga almennilegir frídagar að vera.
Verð víst að drífa mig (og krakkana) í bæinn í fyrramálið til þess að kaupa gjöfina því mér er boðið í skírn á morgun.

Góða nótt!

P.S. U2 miðarnir eru komnir í hús!